Vakio ny "Teo amin'ny tendrombohitra Oliva" (toko 69) ao amin'ny IFM.
Marobe ny zava-mitranga mampitebiteby eto amin'izao tontolo izao. Mihorohoro fatratra ny olona manoloana ny toe-java-misy. Amin'ny maha-Advantista Mitandrina ny Andro Fahafito antsika, izay manana fahalalana fanampiny momba ireo toe-javatra miseho, ahoana no ampiasantsika izany mba hampitodihana ny olona amin'ny fanantenana ananantsika ao amin'i Jesôsy sy ny teny fikasana ny amin'ny fiaviany?
"Satria tsy fantatsika ny fotoana marina hiaviany, dia hafatrafarana isika hiambina. `Sambatra ny mpanompo izay ho hitan'ny tompony miambina, raha avy Izy.' Izay miambina ny hiavian'ny Tompo dia tsy midonanaka foana eo am-piandrasana. Mahatonga ny olona hatahotra ny Tompo sy hatahotra ny fitsarana hahatra amin'ny fandikan-dalàna ny fiandrasana an'i Kristy. Mamoha azy hiala amin'ny fahotana lehibe dia ny fitsipahana ny famindrampo atolony izany. Izay miandry ny Tompo dia manadio ny fanahiny amin'ny fankatoavana ny fahamarinana. Akambany amin'ny fiambenana mailo ny asa amin-kafanam-po. Satria fantany fa eo am-baravarana ny Tompo, dia mihamatanjaka ny zotom-pony hiara-miasa amin'ny anjelin'ny lanitra eo amin'ny famonjena ny fanahy. Ireo no mpanompo mahatoky sy hendry izay manome ny ankohonan'ny Tompo ‘ny anjara hanina amin'ny fotoana'. Manambara ny fahamarinana izay azo ampiharina ankehitriny izy. Toa an'i Enoka, Noa, Abrahama sy Mosesy, izay samy nanambara ny fahamarinana tamin'ny androny avy, toy izany koa ny mpanompon'i Kristy ankehitriny mitondra fampitandremana manokana ho an'ny taranaka misy azy izy."- IFM, t. 681.
FANONTANIANA hifanakalozan-kevitra
1. Zavatra iray ny manolotra fanomezana hanohanana ny raharahan'Andriamanitra, ary zavatra iray hafa ny manome amim-pahafoizana. Inona no maha samy hafa izany, ary nahoana no zava-dehibe izany fahasamihafana izany?
2. Nahoana no tsy nosakanan'Andriamanitra ny fanenjehana ny vahoakany tao anatin'ny taonjato maro sy amin'izao fotoana izao? Ahoana no anampian'ny fifanandrinana lehibe antsika hahatakatra ny antony isian'ny fanenjehana?
3. Inona amin'ireo famantarana ny fiverenan'i Kristy no voamarikao manokana eto amin'izao tontolo izao ankehitriny?
4. Eritrereto ny amin'ny toetry ny maty sy ny filazana fa matory ny maty mandra-piverenan'i Kristy. Mikimpy ny mason'ny maty, ary inona no hitany raha vao misokatra indray izany? Ahoana no anampian'izany antsika hahita, ho an'ny tsirairay manokana, fa akaiky mandrakariva ny fiavian'i Kristy fanindroany?