Hodinihina mandritra ny herinandro: Sal. 18:3-18; Sal. 41:1-3; Deo. 15:7- 11; Sal. 82; Sal. 96:6-10; Sal. 99:1-4; Rôm. 8:34.
Tsianjery: "Noho ny fampahoriana ny ory sy ny fisentoan'ny malahelo, dia hitsangana Aho ankehitriny, hoy Jehovah; hovonjeko izay vingavingain'ny sasany."- Sal. 12:5.
Tsy izao androntsika izao ihany no vanim-potoana anjakan'ny faharatsiana sy ny tsy rariny ary ny fampahoriana. Toy izany koa ny tamin'ny andron'ny mpanao Salamo. Ary na ahoana na ahoana, ny Salamo dia fanehoan'Andriamanitra ny tsy fankasitrahany ny herisetra sy ny fampijaliana eto amin'izao tontolo izao, dia ny tontolo misy antsika sy ny an'ilay mpanao Salamo koa.
Eny tokoa, manam-paharetana lehibe ny Tompo ka mahari-po sy malain-ko tezitra, mba tsy hisy ho very fa ho tonga amin'ny fibebahana sy hiala amin'ny lalan- dratsiny ny olona rehetra (2 Pet. 3:9-15). Ary na dia tsy mifanandrify mandrakariva amin'izay antenain'ny olombelona aza ny fotoana idiran'Andriamanitra an- tsehatra, dia ho tonga tokoa ny andro fitsaran'Andriamanitra (Sal. 96:13; Sal. 98:9). Ny hany ilaintsika dia ny matoky Azy sy ny teny fikasany mandra-piavin'io andro io.
Ny Mpahary irery ihany, Izay fahamarinana sy fitsarana no fanorenan'ny seza fiandrianany (Sal. 89:14; Sal. 97:2), no mahay manamafy orina sy manome fahombiazana ho an'izao tontolo izao amin'ny alalan'ny fitsarany amin'ny maha- mpanjaka azy. Ireto lafiny roa ireto no mandrafitra ny fitsaran'Andriamanitra: ny fanafahana ny ampahoriana sy ny fandringanana ny ratsy fanahy (Sal. 7:6-17).
Izany no toky nomena antsika, ary ho tonga tokoa izany andro izany - saingy amin'ny fotoan'Andriamanitra fa tsy ny fotoantsika, izay hevitra voizin'ny mpanao Salamo eto.