FIANARANA FANAMPINY
Vakio ny "Mosesy", PM, ed. 1885, tt. 239-248, izay hitondra fanazavana manan-danja eo am-pandinihanao ny ampahan-tSoratra Masina amin'ity herinandro ity.
Izao no voalazan'ny Baiboly: "Nefa natahotra an'Andriamanitra ny mpampivelona ka tsy nanao araka izay nolazain'ny mpanjakan'i Egypta taminy, fa novelominy ihany ny zazalahy." - Eks. 1:17. Manazava tsara ny fahatokian'ireo mpampivelona ireo, sy ny fanantenana momba ny Mesia, i Ellen G. White. "Nomena baiko ny mpampivelona Hebreo mba hamono ny zazalahy teraka rehetra. Tsy iza no nanome izany baiko feno habibiana izany, fa Satana izay nahafantatra ny fampanantenana ny hiavian'ny Mpanafaka ka nihevitra ny hanafoana ny planan'Andriamanitra. Nefa natahotra an'Andriamanitra ny mpampivelona ka nandà tsy hanatanteraka izany didy tsy mifaditrovana izany, dia nasian'Andriamanitra soa ireo mpampivelona sady nambininy." - PM, ed. 1985, t. 240.
Izao no vaovao mahafaly amin'izany rehetra izany: na eo aza ny drafitr'i Satana dia nandresy Andriamanitra, ary nampiasa olona mahatoky Izy mba hampandamoka ny planin'ny fahavalo. Ao anatin'ny faritanin'ny fahavalo no misy antsika, izay nantsoin'i Jesosy hoe "mpanapaka" na "andrianan'izao tontolo izao" (Efes. 2:2; Jao. 14:30). Nalain'i Satana an-keriny tamin'i Adama io toerana io, saingy nandresy azy i Jesôsy Kristy tamin'ny alalan'ny fiainany sy ny fahafatesany teo amin'ny hazo fijaliana (Mat. 4:1-11, Jao. 19:30, Heb. 2:14). Na mbola velona sy miasa aza i Satana, araka ny asehon'ny fikasany hamono ireo zaza ireo, dia efa azo antoka kosa ny fandringanana azy (Jao. 12:31; Jao. 16:11; Apôk. 20:9,10,14). Azo resena amin'ny alalan'ny fahasoavan'Andriamanitra ireo zava-tsarotra eo amin'ny fiainana (Fil. 4:13); izany no vaovao mahafaly. lo fahasoavana io no hany fanantenantsika.
FANONTANIANA hifanakalozan-kevitra
1. Nahoana no navelan'Andriamanitra honina tany Egypta sy hampahorina ny Hebreo? Nahoana no niandry ela Andriamanitra vao niditra an-tsehatra ho azy ireo? Tsarovy koa anefa fa tsy nijaly mihoatra ny halavan'ny androm-piainany ny olona tsirairay, izany hoe, marina fa nijaly nandritra ny fotoana maharitra ny firenena, fa ny olona tsirairay kosa dia tsy nizaka afa-tsy izay fahoriana natrehiny teo amin'ny fiainany manokana ihany. Nahoana no zava-dehibe ny fanaovana izany fanavahana izany mba hahatakarana ny momba ny fahorian'ny olombelona ankapobeny?
2. Saintsaino misimisy kokoa ny mikasika ny fomba nahafahan' Andriamanitra nampiasa ny fihetsika feno herisetra nataon'i Mosesy tamin'ny namonoany ilay Egyptianina. Andeha hatao hoe tsy nanao izany izy; midika ve izany fa tsy ho tafavoaka ny tany Egypta mihitsy ny Hebreo noho izany? Hazavao ny hevitrao.