ILAY MPAMINANY MALAINA
Nisy fiantraikany manan-danja ny tantaran'i Jôna na dia fohy ihany aza (jereo ny Jõna 1-4). Mpino marobe no nahita taratra ny tenany teo amin'ity mpaminany malaina hamita iraka ity. Ahitana fanazavan-dalana mikasika ireo toe-javatra hiseho amin'ny farany koa ao amin'ny tantaran'i Jôna.
Vakio ny Mat. 12:38-42. Ampahany inona amin'ny tantaran'i Jôna no naverin'i Jesosy raha niresaka tamin'ireo mpanora-dalana sy Fariseo Izy? Inona ny lesona momba ny fitsarana hitantsika ao amin'ny fanambarany?
Nambaran'i Jesosy ny maha-lehibe noho i Jôna Azy. Fantany fa ny fahatongavana eto amin'ity tontolo ity dia midika ho hazo fijaliana nefa mbola tonga ihany Izy mba "hitady sy hamonjy ny very." - Lio. 19:10. Nandritra ny telo andro i Jôna no tao an-kibon'ny hazandrano noho ny fahotany ihany, i Jesosy kosa nijanona telo andro tao am-pasana noho ny fahotantsika. Izany no nilaina mba hamonjena ny very.
Amin'izao fotoana izao, dia mpaminany malaina izay nandà tsy hankany Ninive no ahafantarantsika an'i Jôna. Mora ny mahatakatra izany raha ny fomba fijerin'olombelona: fanjakana fatra-pampiasa herisetra ny Asirianina. Feno toe-javatra ahitana habibiana tsy fahita teny amin'ny sarisary manaingo ny rindrin'izy ireo: novonoina tamin'ny fomba feno habibiana indrindra ireo olona azony ho babo. Iza moa no haniry hirahina mba hitory fibebahana any amin'ny renivohitr'izy ireo?
Misy fotoana iray manan-danja ao amin'io tantara io izay azo heverina fa manondro mialoha ny fihetsehana misy ireo sisa amin'ny andro farany: rehefa nanontaniana ny mombamomba azy i Jôna, dia izao no navaliny: "Hebreo aho; ary Jehôvah , Andriamanitry ny lanitra, no ivavahako, dia Izay nanao ny ranomasina sy ny tany maina." - Fanambarana manam-pitoviana amin'ny hafatry ny anjely voalohany izany (Jôna 1:9; Apôk. 14:7). Mazava loatra fa manondro ny maha-Mpamorona an'Andriamanitra ny fanasongadinana Azy ho Ilay "nanao ny ranomasina sy ny tany maina." Izany no antony lehibe tokony hiankohofantsika Aminy, ary ny fiankohofana dia lohahevitra iray manan-danja ho an'ireo toe-javatry ny andro farany.
Etsy andanin'izany, isika koa dia nampiandraiketina ny fitoriana hafatra iray tsy mamim-bahoaka ao Babilona ara-panahy. Ny filazana hoe: "Mialà aminy hianareo, ry oloko" - Apôk. 18:4 dia midika ho fitoriana fibebahana amin'izao tontolo izao hafatra izay saika niteraka valinteny mitory fandavana mandrakariva avy amin'ny olona izany- eny fa na dia atao amin'ny fomba feno halemem-panahy indrindra aza. Iza amintsika moa no tsy mbola naharay valinteny mitory fandavana na fankahalana mihitsy aza raha nijoro ho vavolombelona? Tsy afa-misaraka amin'io "asa" io izany.
Firifiry amin'ireo toetran'i Jôna no hitanao eo amin'ny tenanao? Ahoana no ahafahanao miala amin'izany toe-tsaina ratsy izany?