Rehefa nampietrena tamin'ny alalan'ny fikambanan'ny tafiky ny Medianina sy ny Babilonianina (izay notarihin'ny rain'i Nebokadnezara) ny tanánan'i Ninive (612 TIK), dia nisondrotra ho amin'ny toerana tsy mbola nisy azy hatramin'ny andron'i Hammourabi, ilay mpanao lalana lehibe teo aminy, ny tanànan'i Babilona. Raha nanapaka i Nebokadnezara, izay tsy niatrika ny olan'ny fanafihan'ny Asirianina intsony, dia nitombo ny haren'ny tananan'i Babilona sy ny hery miasa mangina avy aminy ka tsy nanan-tsafidy afa-tsy ny hiaiky ny fanapahany ireo firenena nanodidina azy. Tahaka ny mpanjakavavin'izao tontolo izao izy, ary ireo firenena izay naniry ny handroso dia nanambara ny fahatokiany taminy.
Araka ny fantatsika, dia maty tao anatin'ny finoana i Nebokadnezara, izay nanambara fa ny Andriamanitr'i Daniela no tena Mpanapaka marina ny firenena rehetra (Dan. 4:31-34). Tantaran'ny mpandimby an'i Nebôkadnezara no tantarain'i Daniela manaraka, i Belsazara mpanjaka.
Vakio ny Dan. 5:1-31. Inona no hafatra ara-panahy manan-danja azontsika sintonina avy amin'io tantara io? Inona no niteraka ny tsy fahombiazan'i Belsazara tamin'ny farany?
Azo heverina fa ao amin'ny Dan. 5:22 no ampahany mahonena indrindra ao amin'ity tantara ity. Rehefa avy nitantara tamin'ny mpanjaka ny fahalavoan'i Nebōkadnezara sy ny fanarenana azy indray i Daniela dia nilaza izao teny izao taminy: "Ary ianao, ry Belsazara zanany, dia tsy mba nampietry ny fonao, na dia fantatrao aza izany rehetra izany." Na dia nanana tombontsoa ny hahalala ny fahamarinana aza izy, na dia azo heverina fa nanatri-maso ny zava-nitranga tamin'i Nebokadnezara aza izy, dia mbola nofidiny ihany ny hanao tsinontsinona ireo toe-javatra ireo sy ny handeha amin'ny lalana izay nitondra olana lehibe ho an'ilay mpanjaka nodimbiasany.
Tahaka izay nataon'i Nebōkadnezara raha nanangana ilay sariolona volamena no nanoheran'i Belsazara ampahibemaso ny zavatra nambaran'ilay Andriamanitr'i Daniela mialoha. Tamin'ny fampiasana ireo fanaky ny tempoly tamin'ny fomba feno fanevatevana no nanasongadinany fa resin'i Babilona ny Jiosy ary izy ireo ankehitriny no tompon'ireo fananana ara-pivavahan'ny Jiosy. Raha lazaina amin'ny teny hafa, dia nihevitra ho nanana fahamboniana noho io Andriamanitra io izay nanambara mialoha ny faharavany izy ireo.
Raha ny marina dia fihaikana tanteraka ny fihetsik'i Belsazara na dia maro noho ny ampy aza ny porofo nomena azy mba hahafantarany ny zava-mitranga. Nanana faharanitan-tsaina ampy hahalalany ny fahamarinana izy, saingy ny fony no olana. Amin'ny andro farany, rehefa manoloana an'izao tontolo izao ny fotoan-tsarotra farany dia homena tombontsoa hahalala ny fahamarinana ny olona. Tahaka an'i Belsazara, dia ny fon'izy ireo koa no hamaritra ny safidiny.