Samy hafa tanteraka amin'ny fomba fijerin'olombelona ny an'Andriamanitra. Amin'ny alalan'ny Baiboly izay Teniny izarany amintsika ny fomba fijeriny, eo ambany herin'ny Fanahy Masina. Anjarantsika ny mifidy raha irintsika ny handeha ao amin'ny maizina na handray ny fahazavana izay avy amin'i Jesôsy Kristy araka izay voambaran'ny Teny.
Ao anatin'izany safidy izany tanteraka ny fileferantsika amin'i Jesôsy Kristy, ilay Zanak’Andriamanitra sady Mpanavotra ny taranak'olombelona. Amin'ny alalan'ny herin'ny Fanahy Masina no nanehoan’Andriamanitra Ray tamintsika, tao amin'ny fiainan'i Jesôsy sy ny fahafatesany ary ny fitsanganany tamin'ny maty, ny halalin'ny Fitiavany. Ary fantatsika ny amin'i Jesôsy satria voarakitra ao amin'ny Tenin'Andriamanitra ny momba ny fiainany sy ny fahafatesany ary ny fitsanganany tamin'ny maty.
"Mivezivezy mandrakariva avy eto an-tany ka mankany an-danitra, avy any an- danitra ka manketo an-tany ireo anjelin'Andriamanitra. Ny fahagagana nataon'i Kristy ho an'ny ory sy ny mijaly dia notanterahina tamin'ny herin'Andriamanitra tamin'ny alalan'ny fanompoan'ny anjely. Ary amin'ny alalan'i Kristy, noho ny asa fanompoan'ny mpitondra hafatra avy any an-danitra, no ahatongavan'ny fitahiana rehetra avy amin'Andriamanitra ho antsika. Tamin'ny nandraisan'ny tenany ny maha-olombelona Azy, ny Mpamonjintsika dia nampiray ny tombontsoany tamin'ny an'ireo zanakalahy sy zanakavavin'i Adama lavo, lavo, ary amin'ny alalan'ny maha-Andriamanitra Azy dia mamikitra ny seza fiandrianan’ Andriamanitra Izy. Toy izany no mahatonga an'i Kristy ho Mpanalalana mampifandray ny olona amin'Andriamanitra, ary Andriamanitra amin'ny olona." - IFM, t. 102, ed. 2023.
FANONTANIANA hifanakalozan-kevitra
1. Amin'ireo tantara rehetra ao amin'ny filazantsaran'i Jaona, iza no maneho aminao indrindra ny fitiavan'Andriamanitra sy ny toetrany? Zarao ao amin'ny kilasy ny antony mahatonga izany tantara izany mandresy lahatra anao.
2. Raha lazaina amin'ny fiteny tsotra, ahoana no tokony hataon'ny olona izay mikatsaka ny fahamarinana?
3. Nahoana no sarotra, ankapobeny, ny manilika ny "izaho" mba tsy hitsara izay atao hoe marina? Azontsika atao amin'ny fahafenoany ve izany, sa misy fiantraikany eo amin'ny fomba fijerintsika ny Soratra Masina ihany, amin'ny lafiny sasany, ny mahaolona antsika? Nahoana isika no tokony hiaiky izany, ary ahoana no hanampian'ny fanetren-tena antsika mba hampilefitra amin'ny Tenin'Andriamanitra ny hevitra mibahana mialoha ao anatintsika?
4. Ny tantaran'ny fivavahana kristianina tany amin'ny firenena tandrefana dia nahitana ohatra mahatsiravina marobe momba ny zava-mitranga rehefa avela hanjakan'ny pôlitika sy ny hevitra mibahana mialohan'ny olombelona ny Tenin'Andriamanitra. Inona ny sasany amin'izany ohatra izany, ary inona ny lesona azontsika sintonina avy amin'ireny ankehitriny momba ny loza mety hiseho rehefa tonga masontsivana omen-danja indrindra mba "hanazavana" ny Baiboly ny fomba fijerin'olombelona?
5. Fintino amin'ny fiteninao manokana ny hevi-dehibe avohitry ny filazantsaran'i Jaona. Inona no hafatra manan-danja entin'izany ho antsika amin'izao andro izao?