Vakio ny Jao. 1:9-13. Inona ny zava-misy ambaran'i Jaona amin'ny fomba henjana eto, mahakasika ny fihetsiky ny olona manoloana an'i Jesôsy ?
Tsy ny mombamomba an'i Jesôsy fotsiny, ilay Teny (logos), no lazalazain'ny sasinteny ao amin'ny Jao. 1:1-18 fa resahiny koa ny fihetsiky ny olona eto amin'izao tontolo izao manoloana Azy. Ny "tena Mazava" no iantsoana Azy ao amin'ny Jao. 1:9, dia Ilay manazava ny olona rehetra tonga eto an-tany. Manazava an'izao tontolo izao io Fahazavana io mba hahatakaran'ny olona ny Teny. lzao no nambaran'i C. S. Lewis: "Tahaka ny finoako ny fiposaky ny masoandro no inoako ny fivavahana kristianina, tsy noho ny fahitako izany fotsiny fa noho ny fahitako ny zavatra hafa rehetra noho ny aminy." "Is Theology Poetry?" (n. p.: Samizdat University Press, 2014), t. 15, originally presented 1944.
Jereo ny tian'ny Jao. 1:9 hambara. Tonga amin'ny olon-drehetra ny fahazavana kanefa tsy ny rehetra no mandray tsara Azy. Ho hitantsika ao amin'ny lesona rahampitso ny maha-lohahevi-dehiben'ny filazantsaran'i Jaona ny fomba andraisan'ny olona na andavany an'i Jesôsy. Manomboka eto izany lohahevitra izany. Mampalahelo anefa fa tonga teo amin'ny olony ny Mesia, ny vahoaka lsiraely, saingy marobe no tsy nanaiky Azy ho Mesia.
Miresaka ny amin'izany lohahevitra mampalahelo izany i Paoly ao amin'ny Rôm. 9-11, izay nilazany fa Jiosy maro no nanda an'i Jesôsy. Tsy teny miiba anefa no namaranany izany; nolazainy fa Jiosy maro no hiara-manaiky amin'ny Jentilisa ny maha an'ny Mesian'izy ireo an'i Jesôsy. Nampitandrina ny Jentilisa izy mba tsy hizahozaho amin'ny Jiosy noho ny amin'ny fanekeny an'i Jesôsy. "Fa raha notapahina tamin'ny hazo oliva naniry ho azy hianao ka natsofoka tamin'ny hazo oliva tsara, nefa tsy tena sampany, mainka fa izay tena sampany no hatsofoka amin'ny hazo oliva nanapahana azy." - Rom. 11:24.
Tahatahaka izany ihany no ilazan'i Jaona fa izay rehetra mandray an'i Jesôsy ho Mpamonjiny dia ho tonga zanak'Andriamanitra. Amin’ny finoana ny Anarany no hahatanteraka izany (jereo ny Jao. 1:12,13).
Eo no ifandraisan'ny sasinteny sy ny famaranana ny filazantsaran'i Jaona. Resahin'ilay Apôstôly ao amin'ny Jao. 20:31 ny antony nanoratany: "mba hinoanareo fa Jesôsy no Kristy, Zanak'Andriamanitra, ary mba hanananareo fiainana amin'ny anarany, raha mino hianareo." Araka izany, ny teny fampidirana sy ny famaranana dia karazan-tsinga iray, fitambaran-kevitra izay mamintina ireo zavatra rehetra eo anelanelany. Manondro ny tanjona fototry ny filazantsaran'i Jaona izany fifandraisana izany, dia ny hahatonga ny olona ho voavonjy noho ny finoana an'i Jesôsy Kristy ho Mpamonjy ny tenany.
Nanova ny fiainanao ve ny nahatonga anao ho zanakalahy sy zanakavavin'Andriamanitra? Amin'ny fomba ahoana?