Manafatra ny Filipianina i Paoly ao amin'ny Fil. 2:14, mba hanao "ny zavatra rehetra amin'ny tsi-fimonomononana sy ny tsi-fisalasalana." Sarotra tokoa ny mitahiry ny firaisan'ny fiangonana ka tsy vita izany raha tsy misy ezaka lehibe avy amintsika. Vokatry ny firaisantsika amin'i Kristy sy ny fankatoavantsika ny Teniny ny firaisana ao anatin'ny fiangonana. Ary ain-dehibe ho an'ny asa fitoriantsika izany, araka ny hazavain'i Paoly, izay miantso antsika mba hiseho "tahaka ny fanazavana eo amin'izao tontolo izao."- Fil. 2:15.
Amin'ny alina tsy misy volana sy lavitry ny hazavan'ny tanana sy ny jiron'ny lalana, dia kintana maro kokoa no hita toa mamirapiratra kokoa. Ny tsy fitoviana no mahatonga ny fahasamihafana. Arakaraka ny maha maizina ny lanitra no mampamiratra kokoa ny hazavan'ny kintana. Toy izany koa rehefa mitory isika. Arakaraka ny maha maizina ara-pitondrantena ny tontolo manodidina antsika no mampiharihary ny fifanoherana misy eo amin'ny fiainan'ny mpanara-dia an'Andriamanitra marina sy ny an'ny olon'izao tontolo izao. Zava-dehibe, noho izany, ny tsy hamelantsika ny jiro amboamboarin'izao tontolo izao hampanjavozavo na hamono ny fahazavantsika amin'ny heviny, ny fanereny, na ny fomba amam-panaony.
Vakio ny Fil. 2:15,16. Ahoana no anoritsoritan'i Paoly ny tokony ho toetrantsika sy ny tokony hataontsika, amin'ny maha zanak'Andriamanitra antsika?
Ny hoe "tsy manan-tsiny" dia midika hoe "tsy misy kilema, tsy misy kianina." Nampiasaina manokana izany nilazana ny toetran'i Jôba (jereo ny Jôba 1:1,8; Jôba 2:3; jereo koa ny Jôba 11:4; Jôba 33:9). Ny teny grika nadika hoe "tsy misy fitaka" dia midika ara-bakiteny hoe "tsy mifangaro, madio". Eo anatrehaniny famelezana feno herisetra izay mety hihatra amin'ireo vavolombelony, dia mandrisika antsika i Jesôsy hoe "mora aoka ho tsotra] (avy amin'itay teny grika nadika hoe 'tsy misy fitaka' ihany) tahaka ny voromailala" - Mat. 10:16. Manasa antsika koa i Paoly mba "tsy hiharo amin'izay ratsy" – Rôm. 16:19. Tsy malaza amin'ny fahadiovana, na amin'ny fanabeazana tsara, na amin'ny fampaherezana marina ny haino vaky jerintsika ankehitriny. Fitsipi-piainana tsara ho antsika amin'izao andro izao tokoa ny fanaon'i Davida: "Tsy hampitoetra zava-dratsy eo anoloan'ny masoko aho.'' - Sal. 101:3.
Tsy tokony hatahotra ny hiavaka isika — ny finoantsika aza dia vao mainka tokony hampiavaka antsika bebe kokoa hatrany. Ny isehoantsika "tahaka ny fanazavana eo amin'izao tontolo izao" no tanjona - Fil. 2:15. Ny fomba tokana hahavitana izany dia ny tsy fanarahana ny fanaon'izao tontolo izao (Rôm. 12:2) amin'ny fitanana mafy ny tenin'ny fiainana (Fit. 2:16). Ny safidintsika no mamaritra na hanana antom-pifaliana amin'ny "andron'i Kristy" isika na "nihazakazaka foana na nisasatra foana" (Fil. 2:16; ampitahao amin'ny 1 Kor. 9:24-27).
Raha misy lafiny «manaraka ny fanaon'izao tontolo izao ny fiainanao (ary mety misy tokoa izany), ahoana no hahadio anao ho afaka amin'izany?