SABATA HARIVA
Hodinihina mandritra ny herinandro: Jao. 4:1-42; Jao. 3:26-30; Jer. 2:13; Zak. 14:8; Ezek. 36:25-27.
Tsianjery: "Ary maro koa no nino noho ny teniny ka nanao tamin-dravehivavy hoe: Tsy noho ny filazanao ihany no inoanay, fa ny tenanay no mandre, ka fantatray fa Izy tokoa no Mpamonjy izao tontolo izao." - Jao. 4:41,42
Iza moa ireo Samaritana? Nobaboin’ny Asirianina ny fanjakana avaratr'Isiraely tamin'ny taona 722 TIK. Mba hisian'ny fahamarinan-toerana ara-pôitika dia naelin'ireo Asirianina manerana ny fanjakan-dehibeny ireo azony ho babo. Nentiny mba honina tany amin'ny fanjakana avaratra ireo babony avy tany amin'ny firenen-kafa, ary ireo no tonga Samaritana, izay nanaraka ny fivavahana jodaisma araka ny fanaony manokana.
Tsy tsara anefa ny fifandraisana teo amin'ireo Samaritana ireo sy ny Jiosy. Ohatra tamin'izany ny nanoheran'ny Samaritana ny fanorenana indray ny tempoly rehefa niverina avy tany Babilôna ireo Jiosy. Nanorina ny tempoliny teo an-tendrombohitra Gerizima ireo Samaritana, saingy narodan'ilay mpanapaka jiosy Jean Hyrcan tamin'ny taona 128 TIK izany tempoly izany.
Mbola nitohy io fifankahalana io tamin'ny andron'i Kristy. Nataon'ny Jiosy araka izay tratrany izay tsy hifampiraharahana amin'ny Samaritana. Nanao fifanakalozana ara-barotra izy ireo, saingy voarara ny fifandraisana ankoatra izany. Tsy azon'ny Jiosy natao ny nindrana tamin'ny Samaritana na nandray fanampiana avy tamin'izy ireo. Ao anatin'izany tontolon-kevitra izany no itantaran’i Jaona ny fihaonan'i Jesôsy sy ilay vehivavy teo am-pantsakana, ary ireo olona tao amin'ny tanana samaritana iray antsoina hoe Sykara.