Vakio ny Jao. 4:16-24. Inona no nataon'i Jesôsy mba hanehoana amin'ity vehivavy ity fa fantany ny tsiambaratelony miafina indrindra? Ahoana no navalin'ilay vehivavy izany.
Namirapiratra loatra ilay fahazavana ka tsy hainy ny nijery azy mivantana. Niaiky ny maha -mpaminany an'i Jesôsy ravehivavy kanefa niezaka niala ny toe-javatra indray. Nametraka fanontaniana tamin'i Jesôsy mikasika ny fifanandrinana ara-pivavahana teo amin'ny Jiosy sy ny Samaritana indray izy, mikasika ny toerana tokony hivavahana.
Ho setrin'izany dia nambaran'i Jesôsy taminy fa tsy mahalala izay ivavahan'izy ireo ny Samaritana.. Fitambaran'ny fivavahana jodaisma sy ny fanao jentilisa mantsy ny fivavahany. Ny Jiosy kosa dia nivavaka tamin'ilay Andriamanitra izay nampahalala ny Tenany - fanamarihana manan-danja izany ho an'ny Samaritana anankiray.
Tsy mifaningotra amin'ny toerana iray tsy akory ny fiankohofana amin'ilay Andriamanitra marina. Tsy nilaina araka izany ny fifanakalozan-kevitra mikasika ny toerana tokony hanaovana fanompoam-pivavahana. Satria Fanahy Andriamanitra, dia tsy maintsy mivavaka amin'ny fanahy sy ny fahamarinana izay mivavaka Aminy. Neken'ilay vehivavy ny fahamarinana mazava nambaran'i Jesôsy ary vonona ny handre mihoatra noho izany izy.
Vakio ny Jao. 4:25,26. Ahoana no nampahafantaran'i Jesôsy ny momba Azy tamin’ilay vehivavy?
lo no hany andalan-teny, ao amin'ny filazantsara efatra, izay nanambaran'i Jesôsy mazava tamin'ny olona iray ny maha-Mesia Azy talohan'ny nitsarana Azy. Nilaza izany Izy, tsy teo anoloan'ny vahoaka marobe na ny olo-manan-kaja, fa tamin'ny vehivavy Samaritana iray tsy voatonona anarana, irery, teo amin'ny fantsakan'i Jakôba. Nahaliana Azy ity fanahy manirery izay nahatsiaro ho tafasaraka tamin'ny olona sy irery ity.
Nambaran’i Jesôsy mivantana ny maha-Mesia Azy, tamin'ny vehivavy iray izay tsy hoe hafa fiirenena fotsiny fa olona izay tsy nanana ny fitondran-tena tsara indrindra, rehefa avy nanambara tamin-dravehivavy ny fahafantarany ny tsiambaratelony miafina indrindra Izy, dia nomeny an'ity vehivavy ity koa ny antony iray lehibe tokony hinoany Azy.
Inona no tokony hambaran'io tantara io amintsika mikasika ny antony tokony handravan'ny filazantsara ireo sakantsakana foronintsika olombelona mba hampisaraka antsika?