Tahaka ny nampianaran'i Jesôsy antsika hivavaka ao amin'ny Mat. 6:5-15, dia azontsika atao ny manaraka io modely tsotra io rehefa manatona an'Andriamanitra manokana isika, na miaraka amin'ny ankohonantsika, na miaraka amin'ny fiangonana, ka mahatsiaro fa ny vavaka dia firesahana amin'Andriamanitra toy ny amin'ny namana iray. Matetika loatra ny vavaka ataontsika no feno fangatahana, nefa i Jesôsy nampianatra antsika mba hivavaka ho amin'ny zavatra maro izay lehibe lavitra noho izany!
Vakio ny vavaka nataon'i Daniela ao amin'ny Dan. 9:4-19 ary jereo ireo fizarana samy hafa ao anatin'izany.
Diniho ny fomba ahafahanao mampiditra ireto singa manaraka ireto ao amin'ny vavaka ataonao:
Fiderana: Ny fiderana dia fanehoana haja ho an'Andriamanitra sy fiankohofana Aminy noho ny maha Izy Azy sy ny toetrany. Vakio ny Sal. 100, ilay hira fiderana kanto ho an'Andriamanitra. Saintsaino ireo anarana maro iantsoana an'Andriamanitra sy ny toetrany mahatalanjona. Midera Azy noho ny maha Mpanavotra. Mpamonjy, Mpampahery, Mpanasitrana, Mpiandry tsara, Alfa sy Omega, ary Vatolampy Azy, raha tsy hitanisa afa-tsy ireo isika.
Fiaiken-keloka sy fangataham-pamelana: Rehefa miresaka amin'Andriamanitra sy mitoetra ao Aminy isika, dia tsy maintsy mahafoy izay rehetra mety hampanalavitra na hampisaraka antsika Aminy. Arakaraka ny anakaikezantsika Azy no ahitantsika ny tsy fahamendrehantsika sy ny fahoriantsika. Izany no italahoantsika Aminy mba hanaisotra ny fahotantsika sy hanefy ny toetrantsika ho tahaka ny Azy. Raha miandrandra ny famelan'Andriamanitra isika, dia tsy maintsy vonona hamela ny hafa koa. "Koa mifaneke heloka hianareo, ary mifarnpivavaha, mba ho sitrana hianareo. Ny fiasan'ny fivavaky ny marina dia mahery indrindra." - Jak. 5:16.
Fangatahana: inona avy ireo fihaikana atrehinao mahakasika ny ankohonanao, ny namanao, ny fahasalamana, ny lafiny ara-bola na araka asa, na koa fianarana? Lafiny inona no tianao ny fitarihan'ny tanan'Andriamanitra? Iza no mila ny fanohananao, ary ahoana ny fomba tsara indrindra hanomezanao izany? Ento am-bavaka manokana ireo lafin-javatra sy olona ireo ka angataho mba ny sitrapon'Andriamanitra no ho tanteraka.
Fisaorana: Vakio ny Fil. 4:6 ary saintsaino ireo fitahiana eo amin'ny fiainanao. Mety maro ny zava-dehibe tonga ao an-tsainao, swingy ahoana ny amin'ireo zava-madinidinika izay heverintsika fa mandeha ho azy matetika? Mirotsaka tsy tapaka amintsika ny famindrampon'Andriamanitra, nefa akory ny hakelin'ny fankasitrahana asehontsika sy ny fiderana ataontsika noho izay efa nataony ho antsika.
Inona ny zavatra tokony hideranao an'Andriamanitra, sy tokony hiaikenao eo anatrehany, tokony hangatahinao Aminy ary tokony hanehoanao fisaorana Azy? Nahoana moa raha izao izany dia ataonao?