Vakio ny Kol. 1:21,22. Inona no tian'i Paoly hambara amin'ny hoe: "olon-ko azy" sy hoe "fahavalo"? Ary inona no vokatra antenaina amin'ny alalan'ny fahafatesan'i Kristy (jereo koa ny Efes. 5:27)
Sary manjombona hatrany no anehoan'i Paoly ny olombelona, farafahakeliny rehefa misaraka amin'ny fahamarinan' Kristy. Ary iza ankehitriny, efa ho roa arivo taona aty aoriana, no tsy mahatsapa izany? Nisy olona iray nilaza toy izao indray mandeha: raha misy foto-pampianarana kristianina iray ízay tsy mila finoana dia ity: mpanota ny olombelona.
Na izany aza, hatramin'ny fotoana nidiran'ny ota, dia efa nanao ny dingana voalohany hihavanana amintsika Andriamanitra, na ratsy toy inona aza isika. Izany hoe, hatrany am-piandohana, dia niasa hamaha ny olan'ny ota Andriamanitra, na ny fahafatesany teo amin'ny hazo fijaliana ihany aza no hany hita ho vahaolana.
Tany Edena dia niantso an'i Adama, sanganasany, Izy nanao hoe: "Aiza moa hianao?"- Gen. 3:9. Ary mbola mitady antsika ondriny very Izy ankehitriny. Tadiaviny tsirairay isam-batan'olona isika. Manana drafitra tonga lafatra Izy mba hanatonana antsika, ho fanatanterahana ilay teny fikasana fototry ny filazantsara ao amin'ny Genesisy 3:15, ny hampifandrafy antsika sy i Satana.
Mazána hasarotina sy atao resaka fotsiny ny filazantsara ka zara raha misy heviny amin'ny fiainana amin'izao taonjato faha-21 izao. Nefa, raha ny marina, tena tsotra sy mazava izany.
Misy fizarana telo ny filazantsara:
Voalohany, satria tsy mahay mamonjy ny tenantsika isika, dia tonga i Jesosy ary maty noho ny fahotantsika (Rôm. 5:6-8).
Faharoa, amin'ny fanekentsika ny fahafatesany ho fahafatesantsika, amin'ny alalan'ny finoana, ny fibebahana, ary ny batisa, dia hamarinina sy afahana amin'ny fanamelohana noho ny ota isika (Rôm. 5:9-11; Rôm. 6:6,7).
Fahatelo, ny fiainana ivelomantsika ankehitriny dia vokatry ny firaisana amin'i Kristy, ny fananantsika ny heriny mamorona indray, ary ny fahavelomany ao anatintsika (2 Kôr. 5:17-21; Gal. 2:20).
Tsy voatery ho dingana na tranga misaraka ireo. Afaka miara-mitranga ireo raha vao vonona handray an'i Jesôsy eo amin'ny fiainantsika isika, ary azo havaozina isan'andro eo am-panolorantsika ny tenantsika ho Azy isa-maraina. Na manao ahoana na ahoana fahatsapantsika ny asa famonjen'i Kristy eo amin'ny fiainantsika, dia ny fahafatesan'i Jesosy ihany no fototra lorenany. Tsy maintsy tsaroantsika mandrakariva izany.
Rehefa mijery ny tenanao, ny toetranao, ary ny atifonao ianao, inona no ambaran'izany aminao momba ny filanao ny hazo fijaliana?