NY TANY AMIN'NY MAHA FANOMEZANA AZY
Vakio ny Eks. 3:8; Lev. 20:22; Lev. 25:23; Nom. 13:27: Deo. 4:1,25,26; Deo. 6:3 ary ny Sal. 24:1. Inona ny fifandraisana manokana nisy teo amin’Andriamanitra sy ny Isiraely ary ny Tany Nampanantenaina?
Raha jerena amin'ny fomba tsotra indrindra, dia mamaritra ny maha-izy ny firenena iray ny tany. Sady manondro ny misy ilay firenena izany no mamaritra koa ny asa ataony sy ny fomba fiainany. Tsy nanana fototra niaviana ireo andevo ary tsy nanana ny taniny manokana; olon-kafa no nisitraka ny vokatry ny asany. Nidika ho fahalalahana ny fananana tany. Nisy fifandraisana lehibe tamin'ny fonenan'ireo vahoaka voafidy teo amin'ilay tany ny maha-izy azy ireo.
Nisy fifandraisana manokana teo amin'Andriamanitra sy ny Isiraely ary ny tany. Noraisin'ny Isiraely amin'ny maha-fanomezana avy amin'Andriamanitra azy ny tany fa tsy zo tsy azo foanana tsy akory. An'ireo vahoaka voafidy ny tany raha toa izy ireo ka mitoetra hatrany ao anatin'ny fifandraisam-panekena amin'i Jehovah sy manaja ireo fitsipiky ny fanekena. Raha lazaina amin'ny teny hafa, dia tsy afaka ny hahazo ny tany sy ireo fitahiana ao aminy izy ireo raha tsy noho ny fitahian'Andriamanitra.
Etsy ankilan'izany, dia azo heverina fa fitaovana iray nahafahan'ny Isiraely nahatakatra ny momba an'Andriamanitra bebe kokoa ny tany. Nampahatsiahy azy ireo an'ilay Andriamanitra mahatoky sy mihazona ny teny nomeny ary mendri-pitokisana ny fonenana tao amin'ilay tany. Samy tsy nisy na ny tany na ny Isiraely raha tsy noho ny sitrapon'Andriamanitra izay Loharanon'ny fiainany sy fototra iorenan'ny fisiany. Raha mbola tany Egypta ny Isiraelita, dia ny reniranon'i Neily sy ny rafitra fitarihan-drano tao ary ny asa mafy no nahazoana ny vokatra nilainy mba hivelomana. Tsy tahaka izany kosa tao Kanana. Niantehitra tamin'ny orana izy ireo mba hahavokatra be ny voliny; Andriamanitra irery ihany anefa no afaka mifehy ny toetrandro. Araka izany, dia ny tany no nampahatsiahy ny Isiraely fa niantehitra mandrakariva tamin'Andriamanitra izy ireo.
Na dia nandray ny tany amin'ny maha fanomezana avy amin'i Jehôvah azy aza ny Isiraely, dia Andriamanitra ihany no tena Tompon'izany raha ny marina. Amin'ny maha Tompon'ny tany rehetra Azy (Sal. 24:1), dia zony ny hanolotra izany ho an'ny Isiraely na ny haka izany amin'izy amin' ireo. Raha Andriamanitra no Tompon'ny tany, dia vahiny sy mpivahiny izany ny Isiraelita sy ny olombelona rehetra. Toy izao izany raha lazaina amin'ny fomba fiteny moderina: vahinin'Andriamanitra mandritra ny fotoana maharitra eto amin'ity tany ity isika rehetra.
Raha jerena ny 1 Pet. 2:11 sy ny Heb. 11:9-13, midika inona ho anao manokana ny maha vahiny sy mpivahiny miandry fatratra ilay tanana izay Andriamanitra mihitsy no Tompo-marika sy Mpanao azy?