Vakio ny Sal. 23; Sal. 28:9; Sal. 80:1; Sal. 78:52,53; Sal. 79:13 ary ny Sal. 100:3. Ahoana no anehoana ny fifandraisan'Andriamanitra sy ny olony ao amin'ireo andalan-tSoratra Masina ireo?
Ny sary maneho an'Andriamanitra ho Mpiandry ondry sy ny vahoakany ho ondry andrasany dia manasongadina ny fitarihan'Andriamanitra sy ny fiahiany ny olony ary koa ny fianteheran'ny vahoakany Aminy mba hanome izay rehetra ilain'izy ireo. Hevitra manambara ny fifandraisana ety eo amin'Andriamanitra sy ny olony no asehon'izany sary izany, satria niara-niaina tamin'ireo andian'ondriny ny Mpiandry ondry ary nikarakara ireo ondry tsirairay. Ny sarin'ny mpiandry ondry dia manipika ihany koa ny maha an'Andriamanitra ireo ondriny. Fatorana mafy anankiroa no miantoka izany: ny Famoronana (Sal. 95:6, 7; Sal. 100:3) sy ny Fanekena (Sal. 28:9; Heb. 13:20).
Azo heverina fa ny sary maneho ilay Mpiandry ondry avy any an-danitra izay nitari-dalana an'i Josefa tahaka ny andian'ondry (Sal. 80:1) dia manondro ny tso- dranon'i Jakoba tamin'i Josefa, izay maneho an'Andriamanitra ho mpiandry ny Isiraely ondriny ary koa mangataka ny teny fikasany lehibe sy ny fitahiany (Gen. 49:24).
Noraisina ho mpiandry ireo vahoakany ny mpanjaka (2 Sam. 5:2). Andriamanitra ihany anefa no tena mendrika ny hantsoina amin'izany anarana izany satria tsy mahafeno ny fepetran'izany fiantsoana izany ny mpanjaka olombelona. I Jesôsy ihany no nahafeno izany fepetra izany, izany no iantsoana Azy hoe Mpiandry Tsara.
Vakio ny Jao. 10:11-15. Inona no ambaran'i Jesôsy momba ny Tenany amin'ny maha Mpiandry Tsara Azy?
Hita eo amin'ny fahafantaran'ny ondry ny feon'ny Mpiandry azy ny fifandraisana ety misy eo amin'ilay Mpiandry ondry avy any an-danitra sy ny andian'ondriny (Jao. 10:4, 27). Mandraka ankehitriny, dia hain'ireo mpiandry ondry any Moyen-Orient ny manasaraka ny andian'ondriny izay mifangaro amin'ny ondry hafa amin'ny fiantsoany ireo ondriny izay mahalala ny feon'ilay mpiandry ary manaraka azy.
Misy fotoana iatrehan'ny andian'ondrin'Andriamanitra fahoriana samihafa izay heverin'ny olona ho famantarana ny fahatezeran'Andriamanitra sy ny fahafoizany azy ireo. Tsy mba mahafoy ny ondriny izay mania anefa ny Mpiandry Ondry fa manao izay hamonjena azy ireny. Sary lehibe maneho ny fifandraisan'Andriamanitra amin'ny vahoakany izany. Vonona ny ho faty ho an'ireo ondriny Izy (Jao. 10:11,15) ary tonga Zanak'ondry natao fanatitra noho ny amin'izy ireo mihitsy aza (Jao. 1:29). Nohamafisin'i Jesôsy koa fa hiantso ireo ondriny any amin'ny vala hafa Izy ary hitondra azy ireny hikambana amin'ny andian'ondriny (Jao. 10:16).
Inona avy ireo fomba ahafahanao mandray tombontsoa isan'andro avy amin'ny fananana an'i Jesôsy ho Mpiandry Tsara antsika araka izay nampanantenaina?