Vakio ny Mar. 15:42-47. Inona ny hevitry ny fidiran’i Josefa avy any Arimatia an-tsehatra, indrindra noho ny tsy fahitana ireo mpianatr'i Jesôsy?
Taorianizany zavatra nifamahofaho izany dia toe-javatra "mahazatra" no nitranga. Tsy maintsy alevina mandrakariva ny maty. Misy teboka maromaro izay manaitra amin'ny lafiny ara-panahy anefa, ary misy ireo manan-danja fatratra ara-tantara.
Ao amin'ireo andalan-teny ireo no ahitana voalohany sady farany an'i Josefa avy any Arimatia ao amin'ny Filazantsaran'i Marka. Mambra mendri-kaja tao amin'ny Synedriona izy, ary iray tamin'ireo nantsoina hoe "sangany" teo amin'ny fiarahamonina. Amin'ny maha-lehilahy mpanankarena sy nohajaina fatratra azy dia nanana ny maha-izy azy teo imason'ny governora izy, izay manazava ny fananany fahasahiana hanatona an'i Pilato sy hangataka ny fatin'i Jesôsy.
Tsipirian-javatra manaitra ny fahitana mambra iray tao amin'ny filan-kevitry ny Synedriona liana amin'ny fandevenana an'i Jesôsy. Taiza tokoa moa ireo mpianatra nitokian'i Jesôsy tao anatin'izany toe-javatra rehetra izany? Tsipirian-javatra ara-tantara iray manan-danja tokoa eto ny fanamarinana ny fahafatesan'i Jesôsy. Ambaran'ny Mar. 15:43 fa nangataka ny fatin'i Jesôsy i Josefa. Gaga i Pilato raha nahare fa efa maty sahady i Jesôsy (Mar. 15:44). Nampanantsoiny, araka izany, ilay kapiteny nampiandraiketiny ny fanomboana an'i Jesôsy ary nanontaniany raha efa maty tokoa i Jesôsy. Nanamafy izany ilay kapiteny.
Zava-dehibe izany satria misy ireo nanambara tato aoriana fa tsy maty teo amin'ny hazo fijaliana i Jesôsy fa torana fotsiny. Ny fijoroan'ilay kapiteny ho vavolombelona teo anatrehan'ny governora rômanina no manohitra mivantana izany fanambarana izany. Hain'ny Rômanina rahateo ny mamono ireo mpanao heloka bevava.
Nividy hariry madinika mba hamonosana ny fatin'i Jesôsy i Josefa ary naleviny tao amin'ny fasana, izay nolavahana tamin'ny vatolampy, lzy. Nalalaka io fasana io ka azo nidirana tao anatiny (Mar. 16:5). Ankoatra an'i Josefa, dia nanannarika vehivavy roa izay nahita io toerana io ny mpanoratra ny filazantsara - i Maria Magdalena sy i Maria renin'i Josesy. lzy roa vavy ireo niaraka tamin'i Salome no nijery ny fanomboana an'i Jesôsy tamin'ny hazo fijaliana teny lavitra; izy telo ireo no nandeha tany amin'ny fasana ny Alahady maraina mba hanosotra ny fatin'i Jesôsy araka izay noheveriny (Mar. 16:1).
Nahoana moa no notononina ny anaran'ireo vehivavy telo ireo? Ho vavolombelon'ny fasana foana izy ireo ao amin'ny Mar. 16; vavolombelona lehiben'ny fitsanganan'i Jesôsy amin'ny maty izy ireo.
Toa mahagaga ny tsy nanatrehan'ireo mpanara-dia an'i Jesôsy ny toe-javatra kanefa ny mambran'ny Synedriona, ilay sokajin'olona izay nanameloka an'i Jesôsy, no tonga "mahery fo" eto. Ahoana no ahazoantsika antoka fa hanatrika ny toe-javatra manan-danja koa isika amin'ny fotoana hisian'izany?