Vakio ny Jao. 11:11-14, 21-25; 2 Tim. 1:10; 1 Kôr. 15:51-54; sy ny 1 Tes. 4:15-17. Ahoana ny fanoritsoritan'ny mpanoratra ny Testamenta Vaovao ny fahafatesana raha mitaha amin'ny an'ny Testamenta Taloha?
Samy mampiasa ny torimaso ho tandindon'ny fahafatesana ny Testamenta Taloha sy ny Testamenta Vaovao. In-53 farafahakeliny no ampitoviana ny teny hoe "torimaso" amin'ny fahafatesana ao amin'ny Baiboly. Ny mpanoratra ny Baiboly dia manaiky fa tsy misy fahatsiarovan-tena ao anatin'ny fanahy tsy mety maty izay mandao ny vatana aorian'ny fahafatesana.
Milaza hevitra fanampiny izay efa nolazaina tao amin'ny Testamenta Taloha ny Testamenta Vaovao: ny fitsanganana amin'ny maty be voninahitra amin'ny fiavian'i Kristy.
Ireo bokin'ny Filazantsara dia manasongadina fa ao amin'i Kristy irery ihany no misy fiainana mandrakizay. Tsy azon'ny demonian'ny helo rehetra atao ny handrombaka eo amin'ny mpino ny toky ananan'izy ireo mikasika ny fiainana mandrakizay. Nandresy ny fahafatesana teo amin'ny hazo fijaliana i Kristy. Tsy afaka mihazona ireo nalavony intsony ny fasana. Ny fitsanganan'i Kristy tamin'ny maty no antoka fa ny mpino rehetra dia hitsangana amin'ny maty indray andro any rehefa ho avy Izy.
Jereo ity tenin'i Paoly ity: "Fa raha tsy hatsangana ny maty, na dia Kristy koa aza dia tsy natsangana; ary raha tsy natsangana Kristy, dia foana ny finoanareo; ary mbola ao amin'ny fahotanareo ihany hianareo; dia very koa izay efa nodimandry ao amin'i Kristy." - 1 Kôr. 15:16-18. Ahoana no ahafahana manome heviny ireo andininy ireo raha efa any amin'ny fahasambaran'ny lanitra ny maty amin'ny fotoana ahafatesany? Inona no tian'i Paoly holazaina amin'ny hoe "very" raha toa izy ireo efa any an-danitra?
Mifanohitra amin'izany, dia izao no tian'i Paoly hambara: ny fitsanganan'i Kristy tamin'ny maty no fototry ny fitsanganantsika amin'ny maty ary raha tsy misy ny fitsanganana amin'ny maty dia "foana ny finoanareo; ary mbola ao amin'ny fahotanareo ihany hianareo", ary mijanona ao amin'ny tany ny maty ka very.
Mifanaraka tanteraka amin'ny andinin-tSoratra Masina hafa momba ny fanantenana ananantsika ny amin'ny fitsanganana amin'ny maty amin'ny fiavian'i Jesôsy ireo andininy ireo rehefa mandray "ny lova tsy mety simba, tsy misy loto, tsy mety levona, voatahiry any an-danitra ho anareo" isika (1 Pet. 1:4). Raha toa efa any an-danitra tokoa ny maty, nahoana ary i Petera no miresaka ny amin'ny lova "voatahiry any an-danitra" ho antsika? Mazava fa niandry fatratra ny fiavian'i Kristy sy ny fitsanganana amin'ny maty ireo mpino tao amin'ny Testamenta Vaovao, ary izany fanantenana izany no nanentana azy ireo ho mahatoky tamin'ireo fizahan-toetra teo amin'ny fiainana.
Nahoana ny fitsanganana amin'ny maty no fanantenana miezinezina tokoa ho an'ny finoana kristianina? Inona no hitranga raha teo ny hazo fijaliana kanefa tsy misy ny fitsanganana amin'ny maty? Inona ny fanantenana hananantsika? Nahoana ary ny fitsanganana amin'ny maty no singa iray manan-danja tokoa ho an'ny finoantsika?