Vakio ny Mar. 8:31-38. Inona no ampianarin'i Jesôsy eto momba ny sandan'ny fanarahana an'i Kristy?
Tonga eo amin'ny kihon-dalana iray lehibe eo amin'ny fifandraisany amin'i Jesôsy ny mpianatra. Fantatr'izy ireo ankehitriny fa Izy no Mesia. Ny mpamaky ny bokin'ny Marka dia efa mahalala izany hatrany am-boalohany (Mar. 1:1) ka manana tombony raha miolotra amin'ireto mpianatra mbola mikaviavia.
Tamin'ny fotoana voalohany niantsoan'i Jesôsy ny mpianany dia nilaza Izy fa hataony mpanarato olona izy ireo (Mar. 1:17). Tsy mbola nisy resaka fotoan-tsarotra teto. Kanefa satria efa fantatr'izy ireo izao hoe lza marina Izy, dia novelariny teo anatrehan'ireto mpianatra ireto ny zava-kendren'ny iraka nampanaovina azy - tsy maintsy hijaly mafy ka holavina sy hovonoina Izy, ary rehefa afaka hateloana, dia hitsangana indray.
Mahatohina izany vaovao izany. I Petera, ilay vao avy niaiky teo fa i Jesôsy no Mesia, dia nanjary naka Azy mitokana ka nananatra Azy tsy hiteny zavatra toy izany. Taterin'i Marka mivantana ny tenin'i Jesôsy taorian'izany, izay inoana fa nanindrona ny fon'i Petera ny nandre azy. Nantsoin'i Jesôsy hoe Satana i Petera sady nasainy nankany ivohony satria tsy mifanaraka amin'ny sitrapon'Andriamanitra ny fisainany.
"Tsy ho fanampiana na ho fampiononana ho an'i Jesôsy eo amin'ny fitsapana lehibe manoloana Azy ny tenin'i Petera. Tsy nifandrindra tamin'ny fikasan'Andriamanitra momba ny fahasoavana atolony ho an'izao tontolo izao very izany, na nifandrindra tamin'ny leson'ny fahafoizan-tena izay nahatongavan'i Jesôsy hampianarina tamin'ny alalan'ny ohatra nomeny."- IFM, t. 446.
Antsoina hanana tanjona mitovy amin'ny an'i Jesôsy ireo mpianany, dia ny hitondra ny hazo fijaliana ka hanaraka Azy. Ny fanomboana amin'ny hazo fijaliana no famonoan'olona, izay fomba tsy mifaditrovana, manala baraka, ary mampihorohoro indrindra, fantatr'i Rôma. Andosiran'ny olona amin'ny fomba rehetra tokoa ny hazo fijaliana. Koa hisy olona ve haniry hitondra hazo fijaliana ho fanehoana ny fanoloran-tenany ho an'i Jesôsy?
Tsy ny sandan'ny maha-mpianatra ihany no nohazavain'i Jesôsy fa ny maha-zava-dehibe indrindra izany koa. Amin'ny finoana kristianina dia izay mahavery ny ainy no hamonjy izany. Fa raha mahazo izao tontolo izao kosa ny olona kanefa veriny ny fiainana mandrakizay, dia fahadalana sy fatiantoka izany. Nilaza izany mazava i Jim Elliott, amin'ny maha-misiônera azy, tao amin'ny Iahatsorany ny 28 Oktôbra 1949, nanao hoe: "tsy adala ny olona izay mahafoy ny zavatra tsy hainy tehirizina ho takalon'ny zavatra izay tsy ho foiny mandrakizay."
"Izay tia ny ainy no mahavery izany; fa izay mankahala ny ainy amin’izao fiainana izao no hiaro izany ho amin'ny fiainana mandrakizay." Jao. 12:25. Ahoana no efa nahatsapanao ny fahamarinan'io teny io?