"Ary Andriamanitry ny fiadanana, (...) Izy anie hahatanteraka anareo amin'ny tsara rehetra hanao ny sitrapony ka hiasa ao anatinareo izay ankasitrahana eo imasony amin'ny alalan’i Jesôsy Kristy; ho Azy anie ny voninahitra mandrakizay mandrakizay." - Heb. 13:20,21.
Mofon’aina:
Raha mandinika ny tenin' Andriamanitra sy mampihatra ny fampianarany eo amin'ny raharahany ara-barotra rehetra ny olona dia ho fantany ny toe-tsaina mifehy ny asany. Azony atao ny tsy manaraka ny firehana sy ny fironana maha-olombelona fa mianatra amin-jotom-po kosa ireo foto-kevitra tokony hifehy ireo zanakalahy sy zanakavavin' i Adama.
Ny Baiboly no tari-dalana mamaha ireo olana lehibe ao amin'ny saina mirona ho amin'ny fitiavan-tena. Maneho taratra ny fahendren' Andriamanitra izy, ary tsy foto-kevitra lehibe manan-danja fotsiny no raketiny fa lesona tsotra azo ampiharina amin'ny fiainana sy ny fitondran-tenan'ny olona amin'ny olona namany koa. (...) Fanambarana feno ny toetran'Andriamanitra sy ny sitrapony, araka ny fiainan'i Jesosy Kristy, ny Baiboly, ary aseho ao ny adidin'ny olombelona tokony hanompo an'Andriamanitra amin'ny fo manontolo, sy hanontany isaky ny indray mandingana hoe: "Sitrapon'ny Tompo ve ity?" (...)
Voafitaky ny fahasimban'ny fomba fijeriny ny sain'ireo izay tsy voahosotra odi-maso avy any an-danitra ny masony mba hahitany ny zavatra rehetra eo ambany fanazavan'ny Tenin'Andriamanitra. Voageja ny sitrapo ka voatery hanaraka lalana izay tsy tohanan'ny Tenin'Andriamanitra. Tsy azon'olona, na iza na iza fehezina ny sitrapon'ny olona iray hafa. Raha vao safotra ao ambadiky ny sitrapon'ny olona hafa ny sitrapon'ny olona iray dia voafitaka izy. (...)
Raha manaiky ny olona, dia azon'Andriamanitra atao ary faniriany ny hanao izay hitovian'ny sitrapo sy ny fisainantsika ary ny tanjontsika amin'ny Azy; tiany hifandrindra amin'ny Teniny ny fontsika sy ny saintsika, hany ka rehefa mankatò ny sitrapony isika dia tsy manao afa-tsy manatanteraka ny firehana ao an-tsaintsika rahateo. Ho lavitra ny olona toy izany ny toetra tsy masina, na tia tena, fa hafana fo sy ho tapa-kevitra izy hiasa amin'ny fahasaro-piaro ho voninahitr'Andriamanitra.
Tsy maintsy mitondra ny ziogan'i Kristy izay rehetra te hamolavola toetra kristianina tanteraka. Raha tian'izy ireo ny hiara-mipetraka any an-danitra ao amin'i Kristy Jesôsy, dia tsy maintsy mianatra Aminy dieny eto an-tany izy ireo. — UL, t. 187.