"Endrey ny fitiavako ny lalànao, fisaintsainako mandrakariva izany." - Sal. 119:97.
Mofon’aina:
Aoka ireo izay manaja ny fitsipika, toy ny hoe tsy misy na nona na inona mety hampiala azy amin' izany, hahazo antoka fa takany tsara ireo fitsipika ambara ao amin'ny Baiboly mba hitarihan-dalana antsika. Misy ireo izay manaraka fitsipika diso. Tsy araka ny tokony ho izy ny fisainany momba ny fitsipika. Ny fitandremana amim-pahatokiana ny didy efatra voalohany sy ny didy enina farany no atao hoe manaraka ny fitsipika marina. Ny fankatoavana ireo didin'Andriamanitra ireo no atao hoe mihinana ny nofon'i Kristy sy misotro ny rany (...). Homba izay rehetra mandray Azy ho Mpamonjiny i Kristy. Homeny hery ho tonga zanak'Andriamanitra izy ireo. (...)
Ny Zanak'Andriamanitra no lazaina hoe "Teny" ao amin'ny Jao. 1:14, Ilay Kômandy tany an-danitra nefa tonga teto amin'izao tontolo izao hanambara ny zava-panahy amin'ny olombelona lavo. Izy no lalana sy fahamarinana ary fiainana. (...) Rehefa tonga nofo Izy dia nanjary sady Andriamanitra no olombelona, ary izany no mahatonga Azy ho afaka manavotra tanteraka ny taranak'olombelona sy mamerina azy ireo ho amin'ny tombon-tsoan'ilay fiainana ambony kokoa.
Tahaka ny olombelona no nanombohany ny fiainany teto an-tany; teraka toy ny zazakely tsy afa-manoatra Izy. Nanana fiainana tahaka ny olombelona rehetra Izy, izay handray ny fanomezan-tsarobidy avy amin'Andriamariitra ho an'izao tontolo izao, dia ny Zanany nirahiny hanatanteraka ny drafi-panavotana.
Nizaka ny sazin'ny ota i Kristy, niharan’ny fitsaran' Andriamanitra, mba tsy ho very ny olombelona. Ny tenany no nampiharana ny didim-pitsarana tokony ho an'ny mpanota. Izany no siansan'ny famonjena, izay azo halalinina tsara sady mahasoa ny fiezahana hahatakatra izany. (...)
Hotsaraina araka ny fandavany ny fahazavana ireo izay manohy mandika ny lalàna. Mifidy hiandany amin'ny mpanjakan'ny fahamaizinana izy ireo, ka manjary tanany ankavanana (...). Mandà ilay fahazavana mahagaga avy any an-danitra izy ireo, ary na mety hitory fahamarinana aza izy ka miresaka ny amin'ny "fanarahana fitsipika", dia tsipahiny ny fitsipiky ny lanitra feno fahamendrehana, ary ampianariny hanaraka izany fitsipika diso izany koa ny hafa. — UL, t. 196.