"Telon-jato sy roa arivo andro; ary nony afaka izany, dia amin'izay vao hodiovina ny fitoerana masina." - Dan. 8:14.
Mofon’aina:
Mibaiko antsika Andriamanitra hanolotra ny fotoantsika sy ny herintsika ho amin'ny asa fitoriana ilay hafatra izay nampientanentana ireo lehilahy sy vehivavy tamin'ny taona 1843 sy 1844. (…)
Ry mpiray fanantenana malala, mijoroa eo amin'izay asain'ny Tompo ijoroanao. Ilaozy eo ireo izay efa nomena fahazavana ombieny ombieny kanefa mbola mifidy hiandany amin'ny fahavalo ihany. (...) Tanteraho ny asa nampanaovina antsika. Ny Tenin'Andriamanitra no hafatra entinao, koa mijoroa eo amin'ny polipitran'ny fahamarinana ka torio ny fiavian'i Kristy tsy ho ela. Tsy maintsy handresy ny fahamarinana mandrakizay.
Niadian-kevitra sy notoherina nandritra ny antsasaky ny taonjato mahery ireo lafiny samihafa amin'ny fahamarinana ankehitriny. Nisy tsangan-kevitra vaovao naroso ho fahamarinana, kanefa tsy fahamarinana, dia nasehon'ny Fanahin'Andriamanitra ny fahadisoany. Rehefa naseho ireo andry lehiben'ny finoantsika dia vavolombelona nanamarina izany ny Fanahy Masina, indrindra ny fahamarinana momba ny fitoerana masina. Nanohana mandrakariva io foto-pinoana io tamin'ny fomba miavaka ny Fanahy Masina. Saingy ankehitriny, toy ny taloha ihany, dia hisy olona sasany ho voatarika hamorona tsangan-kevitra vaovao sy handà ny fahamarinana izay efa nasian'ny Fanahin'Andriamanitra tombokase.
Na iza na iza maneho tsangan-kevitra izay mampiala antsika amin' ilay fahazavana tonga tamintsika momba ny fanompoana ao amin'ny fitoerana masina any an-danitra, dia tsy tokony hekena ho mpampianatra. Zava-dehibe tokoa ho antsika vahoakan' Andriamanitra ny mahatakatra araka ny tokony ho izy ny amin'ny fitoerana masina. Rehefa nikatsaka fatratra ny hahazo fanazavana mikasika izany isika, dia tonga ny fahazavana. (...)
Fantatro, tamin'ny alalan'ny fahazavana nomen'Andriamanitra ahy fa tokony hofohazina ireo hafatra efa notorina tamin'ny fotoana lasa satria hisy olona hitondra tsangan-kevitra vaovao, ka hiezaka hanaporofo fa ara-tSoratra Masina izany kanjo hevi-diso (...). Tsy azontsika atao ny manaiky ireny hevitra ireny toy ny fahamarinana. Tsia, tsy azontsika atao ny mandao ny fahamarinana izay efa nampiorenana antsika.
Hisy olona mandrakariva hitady zava-baovao, ka hanolana ny Tenin'Andriamanitra mba hampifanaraka izany amin'ny tsangan-keviny. Ry mpiray fanantenana malala, aoka isika handray izay nomen'Andriamanitra antsika sy izay nampianarin'ny Fanahiny antsika ho fahamarinana, ka hino izany. — UL, t. 199