"Fa ankehitriny, ry Jakoba ô, izao no lazain'i Jehôvah , Izay nahary anao sady namorona anao, ry Isiraely ô: Aza matahotra hianao, fa efa nanavotra anao Aho; efa niantso ny anaranao Aho, Ahy hianao. " - Isa. 43:1.
Mofon’aina:
Aoka hesorina ny sakana rehetra tsy hahavoavonjy ny vahoakan'Andriamanitra, amin'ny fanokafana ny Tenin'Andriamanitra sy ny fampisehoana mazava ny "izao no lazain 'i Jehôvah". Natao hamirapiratra ny fahazavana satria mandrakotra ny tany sy ny olona ny haizina. Natao hiavaka tsara amin'ny fahadisoana ny fahamarinan'ny Tenin'Andriamanitra velona. Torio ny vaovao mahafaly hoe: manana Mpamonjy Izay nanolotra ny ainy isika mba tsy hisy ho very izay rehetra mino Azy, fa hanana fiainana mandrakizay.
Hisy hanakantsakana ny fandrosoan'ny asan'ny Tompo, saingy aza matahotra. Ilay Andriamanitsika mahefa ny zavatra rehetra sy Mpanjakan'ny mpanjaka ary mitandrina ny fanekeny, dia Mpiandry tsara Izay mikarakara antsika amim-pitiavana ihany koa. Tsy misy mahasakana ny lalany. Tsitoha ny heriny ary izany no maha-azo antoka ny fahatanterahan'ny teny fikasany amin'ny vahoakany. (...)
Ny fiangonan'i Kristy no fitaovana ampiasain'Andriamanitra hitoriana ny fahamarinana, nomeny fahefana hanao asa manokana, ary raha mahatoky amin'Andriamanitra izy ka mankatò ny didiny rehetra, dia hitoetra ao aminy tokoa ny herin'Andriamanitra.
(...) Raha milefitra marina amin'ny sitrapon'Andriamanitra izy dia tsy haharesy azy ny herin'ny fahavalo (...).
Hiposaka amin'ny fiangonana ny maraina mamiratra sy be voninahitra, raha handray ny akanjom-pahamarinan'i Kristy izy ka hiala amin'ny fileferana amin'izao tontolo izao. Izao no fotoana tokony hiaiken'ny fiangonana ny fahadisoany sy hiraisany hina. Ranadahy sy rahavavy, aza avela hisy hampisara-bazana anareo na hampiala anareo amin'Andriamanitra. Aza miresaka tsy fitovian-kevitra, fa miraisa ao amin'ny fitiavana ny fahamarinana araka izay hita ao amin'i Jesôsy. Mankanesa eo anatrehan'Andriamanitra ka ny ran'i Jesôsy no ento mangataka fanampiana ho amin'ny ady atao amin'ny ratsy. Mahazo matoky ianareo fa tsy ho very maina izany vavaka izany. (...)
Miverena amin'ny Tompo, ry mpifatotra manana ny fanantenana. Katsaho ny hery avy amin'Andriamanitra velona. Manàna finoana tsotra, tsy miovaova, mitokia amin'ny heriny sy ny fahavononany hamonjy. Avy amin'i Kristy no hikorianan'ny reniranon'ny famonjena. Izy no loharanon'ny fiainana sy ny hery rehetra. — UL, t. 265.