"Izay rehetra manota no mandika ny lalàna" - 1 Jao. 3:4
Mofon'aina:
Ny faniriana hanana fivavahana moramora izay tsy mitaky fiezahana sy fahafoizan-tena ary fisarahana amin'ny hadalan'izao tontolo izao, no nahatonga ny fampianarana momba " ny finoana, ary ny finoana irery ihany" ho fampianarana mamim-bahoaka. Ahoana kosa hoy ny tenin'Andriamanitra? Hoy ny apôstôly Jakôba: 'Inona moa no soa azo, ry rahalahiko, raha misy milaza fa manam-pinoana izy, nefa tsy manana asa? Ny finoana va mahavonjy azy? (...) Moa tsy fantatrao va, ry olom-poana, fa tsy vanona ny finoana tsy misy asa? Tsy nohamarinina tamin'ny asa va Abrahama razantsika tamin'ny nanaterany an 'i lsaka zanany teo ambonin'ny alitara? Hitanareo fa niara-niasa tamin'ny finoana ny asany, ary ny finoana dia notanterahina tamin'ny asa. (...) Koa dia hitanareo fa hamarinina amin'ny asa ny olona, fa tsy amin'ny finoana ihany.'- Jak. 2:14-24.
Ny fanambaran' ny tenin' Andriamanitra dia manohitra io fampianarana mamela-pandrika momba ny finoana tsy misy asa io. Tsy azo lazaina fa finoana ny mitaky ny fankasitrahan'ny lanitra nefa tsy mameno ny fepetra izay anomezana ny famindrampo, fa fiheverana sahisahy fotsiny izany! (...)
(...) 'Fa ny ota no fandikana ny lalàna.' Izay rehetra manota (mandika ny lalàna) dia tsy nahita na nahalala Azy.' - 1 Jao. 3:6. Na dia nanantitrantitra feno ny amin'ny fitiavana aza i Jaona ao amin'ny epistiliny, dia tsy misalasala koa izy mampibaribary ny tena toetran'ny antokon' olona izay milaza ho nohamasinina, nefa mivelona amin'ny fandikana ny lalàn'Andriamanitra. Izay manao hoe: Fantatro Izy, nefa tsy mitandrina ny didiny, dia mpandainga, ary ny marina tsy ao anatiny. Fa na iza na iza mitandrina ny teniny, dia tanteraka ao aminy marina tokoa ny fitiavana an'Andriamanitra.' - 1 Jao. 2:4, 5.
Eto no fisedrana ny toetran'ny tsirairay. Tsy misy olona na iza na iza azontsika lazaina ho masina raha tsy ampitahaintsika amin'ny filamatra tokan'ny fahamasinana na any an-danitra na ety an-tany izy. Raha tsy tsapan'ny olona ny lanjan'ny lalàna ara-panahy, raha ataony zinona ary hamaivaniny ny fitsipika nomen'Andriamanitra, raha mandika ny anankiray amin'ny kely indrindra amin'ireny didy ireny izy, ka mampianatra ny olona hanao toy izany koa, dia tsy hahazo sitraka eo imason'ny lanitra mihitsy izy (...).-RC, t. 49.