"Ary maty hamonjy ny olona rehetra izy, mba tsy ho velona ho an'ny tenany intsony izay velona, fa ho an 'izay efa maty sy nitsangana hamonjy azy." - 2 Kôr. 5:15
Mofon’aina:
Asan-tanan'Andriamanitra kanto indrindra ny olombelona, nohariany ho amin'ny tanjona ambony sy masina indrindra; ary faniriany ny hanoratra ny lalàny ao amin'ny lafiny rehetra amin'ny tabernakely olombelona (...) Tokony hotehirizina ho madio ny fanomezana nomena eo amin'ny hozatra sy ny nofo rehetra, ary ny saina sy ny vatana.
Ny fikasan'Andriamanitra dia ny hahatonga ny tenan'ny olombelona ho tempolin'ny Fanahiny. Andraikitra ambony no nankinina tamin'ny fanahy tsirairay. Mitarika ho amin'ny tsara na ho amin'ny ratsy ny hery miasa mangina ananan'ny isam-batan'olona. Raha manimba ny tenanao ianao, dia tsy ianao ihany no iharan'ny voka-dratsy amin'izany, fa olona maro hafa koa. (...)
Maty i Kristy mba hamerenana indray amin'ny laoniny ny endrik'Andriamanitra sy ny toetrany eo amin'ny taranak'olombelona, mba hahazoan'ny lehilahy sy ny vehivavy anjara amin'ny toetran'Andriamanitra (...). Tsy tokony hampiasa ny herintsika ho amin'ny fahafaham-po feno fitiavan-tena isika satria Azy avokoa ny hery ananantsika. (...)
Ny fanompoan'ny tena manontolo no takin'Andriamanitra. Iriny raha ho tonga amin'ny tanjona izay nomeny hotratrariny ny lehilahy sy ny vehivavy. Tsy ampy raha toa ny ampahany sasany amin'ny tenan'olombelona ihany no ampiasaina. Tsy maintsy ampiasaina ny tena manontolo raha tsy izany dia tsy tomombana ny fanompoana atao. (...)
Andrasan'Andriamanitra ny hampiasan'ny olona ny fahaiza-misaina nomeny azy. (...) Tiany raha homen' izy ireo ny feon'ny fieritreretana ny toerana ambony indrindra notendrena ho an'izany. Tokony hokolokoloina ny hery ara-tsaina sy ara-batana, miaraka amin'ny fihetseham-po, mba hahefany be araka izay ambony indrindra mety ho tratrany. Amin'izany no hanehoana an'i Kristy amin'izao tontolo izao. (...)
(...) Kolokoloy àry ny finoana izay nomena anao. Aoka ianao hahery ka handresy ny fanao rehetra izay manimba ny tempolin'ny fanahy. Miankina tanteraka amin'Andriamanitra isika, ary matanjaka ny finoantsika rehefa matoky isika na dia tsy haintsika aza ny tanjon'Andriamanitra eo amin'ny fitondrany na koa izay ho vokatr'izany. Mampitodika antsika hiandrandra ny zavatra ho avy ny finoana, ka hifikitra amin'Ilay hany hery izay mahatonga antsika ho tanteraka ao Aminy. RC, t. 165.