« Omeo anay anio izay hanina sahaza ho anay. » Mat. 6:11.
Mofon’aina :
Toy ny zaza, dia isan’andro isan’andro ianao hivavaka hoe: «Omeo anay anio izay hanina sahaza ho anay.» Aza matahotra raha tsy manana ny ampy ho an’ny ampitso ianao. Mijoro eo anatrehanao mandrakariva ny teny fikasana; fa «(...) honina amin’ny tany hianao ka ho faly amin’ny fahamarinana.» - Sal. 37:3. Hoy i Davida: «Efa mba tanora ihany aho, ary efa antitra ankehitriny, fa tsy mbola hitako izay marina nafoy, na ny zanany mangataka hanina» - Sal. 37:25. (...) Ilay Anankiray efa nanamaivana ny enta-mavesatra sy ny tebiteby nahazo ilay reny mpitondra tena, ary nanampy izay ilaina tao amin’ilay tokantrano tao Nazareta, no miara-mitondra amin’ny reny rehetra izay mitolona amin’ny fitadiavan-tsakafo ho an’ny ankizy. (...) Misokatra hitahy ireny ny tanany, ary eto amin’ity fivavahana nomeny ny mpianany ity dia mampianatra antsika Izy mba hahatsiaro ny mahantra. (...)
Tsy sakafo hahatanjaka ny tena ihany no ao anatin’izany fangatahana izany, fa ny sakafo ara-panahy koa, dia izay hamelona ny fanahy ho amin’ny fiainana mandrakizay. I Jesôsy no mibaiko antsika hoe: «Aza miasa hahazo hanina mety ho levona, fa ny hanina izay maharitra ho fiainana mandrakizay.» Ary hoy koa Izy: «Izaho no mofo velona, Izay nidina avy tany an-danitra; raha misy mihinana ity mofo ity, dia ho velona mandrakizay izy» - Jao. 6:27,51. (...)
Avy amin’ny Teniny no andraisantsika an’i Kristy, ary ny Fanahy Masina dia omena mba hanokatra ny Tenin’Andriamanitra amintsika mba hahazoantsika azy tsara sy hampiditra ny fahamarinana ao am-pontsika. (...)
Eo amin’ny fampianaran’Andriamanitra antsika hangataka isan’andro isan’andro izay ilaintsika, na ny fitahiana ara-nofo, na ny ara-panahy, dia misy fikasana tiany hotanterahina mba hahasoa antsika. Tiany hotsaroantsika tsara fa tsy maintsy miankina amin’ny fikarakarany tsy mijanona isika, fa mitady hanintona antsika ho eo amin’ny firaisana aminy Izy. Amin’izany firaisana amin’i Kristy izany, noho ny fivavahana sy ny fianarana ireo fahamarinana lehibe sy saro-bidy ao amin’ny Teniny, dia ho toy ny fanahy noana hovokisana isika; ho sahala amin’ireo mangetaheta isika ka higoka eo amin’ny loharanon’aina. – S, tt. 99,100.