"Ary noho izany ny Jiosy dia nanenjika an'i Jesôsy, satria nanao izany zavatra izany tamin'ny Sabata Izy. Fa Jesôsy namaly azy hoe: Ny Raiko miasa mandraka ankehitriny, ary Izaho koa miasa." - Jao. 5:16,17.
Mofon’aina:
Raby maro nandalim-pahaizana no nonina tao Jerosalema izay isy ny Mpamonjy tamin'izay. Hevi-diso mikasika ny Sabata no nampianarin' izy ireo ny olona tao. (...) Naniry ny hanitsy ireny fahadisoana ireny i Kristy. Izany no antony nanasitranany lehilahy iray tamin'ny andro Sabata sy nilazany tamin'io lehilahy io mba hibata ny fandriany. Fantany fa hanintona ny sain' ireo raby hifantoka Aminy izany, ka hanome azy fotoana fanararaotra hampianarana azy ireo. Izany tokoa no nitranga(...)
Nambaran'ny Mpamonjy fa mifandrindra amin'ny lalàna momba ny Sabata ny asa nataony. Nifanaraka tamin'ny sitrapon'Andriamanitra sy ny Asany izany. "Ny Raiko miasa mandraka ankehitriny, ary Izaho koa miasa" hoy Izy (Jao. 5:17).
Miasa tsy tapaka Andriamanitra ho fanohanana ny zava-manana aina rehetra. Moa ve tokony hitsahatra ny Asany amin'ny andro Sabata? Moa ve Izy tokony handrara ny masoandro tsy hanatanteraka ny asany amin'ny Sabata? Tokony hofoanany tsy hitaratra mba hanafana ny tany sy hamelona ireo zava-maniry ao ve ny tara-masoandro?
Tokony hitsahatra tsy hanondraka ny tanimboly intsony ve ny sakelidrano, ary tokony hampitsahatra ny fitopan'ny onjany ve ny ranomasina? Moa ve ny varim-bazaha sy ny katsaka tokony hampijanona ny faniriny (...)?
Raha izany dia tsy hihinana ny vokatry ny tany ny olona, ary tsy hahazo ireo fitahiana izay mamelona azy. Tsy maintsy manohy ny asany ny zavaboary, raha tsy izany dia ho faty ny olona. (...)
Ny asantsika manokana no raran'ny lalàna tsy hatao amin'ny andro fitsaharan'Andriamanitra. Tsy maintsy atsahatra ny asa fivelomana; fandikan-dalàna ny fanaovana ny asa ho fikatsahana fahafinaretana na tombontsoa araka izao tontolo izao amin'izany andro izany. Kanefa tsy natao holanina foana amin'ny fitomoe-poana ny Sabata. (...) Didiany ny hametrahantsika ny fanaontsika andavanandro ka hanokanantsika ireo ora masina ho an'ny fitsaharana mahasalama, mba hiankohofana Aminy sy hanaovana asa masina. - SJ, 73,74.