"Fa Sabatan'i Jehôvah Andriamanitrao ny andro, fahafito; koa aza manao raharaha akory hianao amin'izany, na ny zanakao-lahy, na ny zanakao-vavy, na ny ankizilahinao, na ny ankizivavinao, na ny ombinao, na ny borikinao, na ny biby fiompinao rehetra, na ny vahininao izay tafiditra eo am-bavahadinao; mba hitsaharan'ny ankizilahinao sy ny ankizivavinao tahaka anao koa." - Deo. 5:14
Mofon’aina:
Nitsangana teo anilan'ny fiaran'ny fanekena i Jesôsy, ary rehefa niakatra nankeo Aminy ny vavak'ireo olona masina, dia namoaka setroka ny ditin-kazo manitra teo amin'ny fandoroana izany, ary natolony ny Ray ny vavak'izy ireo niaraka tamin'ny setroky ny ditin-kazo manitra amin'izy rehetra, satria natokana ny Sabata mba hanomezan-kaja ny anara-nasin'Andriamanitra. (...)
Tao anatin'ny fiaran'ny fanekena ny lovia volamena nisy ny mana, ny tehin'i Arôna izay nitsimoka, ary ireo vato fisaka nisy ny lalàna (...). Nosokafan'i Jesôsy izany, ary hitako ny didy folo voasoratry ny rantsan-tanan'Andriamanitra teo amboniny. Teo amin'ny vato fisaka iray ny didy efatra, ary teo amin'ny ilany kosa ny enina. Namirapiratra kokoa noho ireo didy enina ireo didy efatra teo amin'ny vato fisaka voalohany, nefa ny didy Fahefatra izay momba ny Sabata no namirapiratra indrindra.
Ary naseho ahy fa raha toa Andriamanitra nanova ny Sabata hiala amin'ny andro fahafito ho amin'ny andro voalohany, dia ho nanova ny soratra teo amin'ny didy momba ny Sabata Izy, izay voasoratra teo amin'ny vato fisaka (...). Ho nanao toy izao ny fivakin' izany: Fa Sabatan' i Jehôvah Andriamanitrao ny andro voalohany. Naseho ahy anefa fa tsy niova izay nosoratan'ny rantsan-tanan'Andriamanitra teo amin'ireo vato fisaka nomena an'i Mosesy teo Sinay, "Fa Sabatan’i Jehôvah Andriamanitrao ny andro fahafito." - Eks. 20:10a.
Naseho ahy fa ny Sabata masina no rindrina mampisaraka ny tena Isiraelin'Andriamanitra sy ireo tsy mpino, ankehitriny ary amin'ny hoavy (…). Naseho ahy fa manana zanaka izay tsy mahalala ny Sabata sy tsy mitandrina izany Andriamanitra. Tsy nandà ny fahazavana mamirapiratra eo amin'izany anefa izy ireo. Ary rehefa hanomboka ny androm-pahoriana, dia hofenoina ny Fanahy Masina isika ka handeha hitory ny Sabata amin'ny fahafenoana kokoa. - LS, 100, 101.