"Vato feno lanja sady marina ary famarana tonga ohatra sady marina no aoka hotananao, mba ho maro andro hianao any amin'ny tany izay omen'i Jehôvah Andriamanitrao anao." - Deo. 25:15.
Mofon’aina:
Mahasoa ny fanehoana fahitsiana manoloana ireo namanao sy eo anatrehan' Andriamanitra. Miankina amin'i Kristy ny fahasoavana rehetra azonao, ny hoavy, ny fiainana mandrakizay, ary tsy azonao atao ny hanao tsinontsinona ny valisoa homeny. Ireo izay mahatsapa ny fianteherany amin'Andriamanitra dia hahatsapa ny tokony hanehoany fahitsiana amin'ny hafa, ary ambonin'ny zavatra rehetra, tsy maintsy maneho fahitsiana amin'Andriamanitra izy ireo satria avy Aminy ny fitahiana rehetra eo amin'ny fiainana. Raketin'ny bokin'ny lanitra ho toy ny fandrobana an'Andriamanitra ny fidifiana ny baikony mikasika ny fanatitra sy ny ampahafolony.
Tsy mety hahita fahombiazana marina izay tsy mahatoky eo anatrehan'Andriamanitra sy ny hafa. (...) Efa novidin'ny Tompo tamin'ny rany sarobidy isika, ary noho ny famindrampo sy ny fahasoavana no ahazoantsika manantena ny fanomezan-dehiben'ny famonjena. Omena baiko isika mba hanao ny marina, ho tia famindrampo ary hanaraka an' Andriamanitra amin'ny fanetren-tena. Izao anefa no ambaran'ny Tompo: "nefa Izaho no robainareo, dia izao hianareo rehetra iray firenena izao." - Mal. 3:9. Manamaivana ny fahefan'Andriamanitra isika no sady manao tsinontsinona ny nividianan' i Kristy antsika tamin'ny nanolorany ny ainy rehefa manao ny tsy marina amin'ny namantsika na amin'Andriamanitra.
Mandroba an'Andriamanitra izao tontolo izao manontolo. Arakaraka ny anomezany harena ny olona no anambaran'izy ireo fa azy izany ka azony ampiasaina araka izay mahafinaritra azy. Kanefa moa ve ireo mitonona ho mpanara-dia an'i Kristy hanaraka ny fanaon'izao tontolo izao? Moa ve hafointsika ny fiadanam-po, ny firaisana amin'Andriamanitra sy ny firindram-piarahamonina amin'ireo rahalahy sy anabavintsika noho ny tsy fanokanantsika ho an'ny Asany ny ampahany izay ambarany fa Azy?
Aoka ireo izay mitonona ho Kristianina hahatsiaro fa renivola nankinin' Andriamanitra taminy no anaovany varotra ka takina ny hanarahany amim-pahatokiana ireo toromariky ny Soratra Masina mahakasika ny fitantanana izany. Raha marina eo anatrehan'Andriamanitra ny fonao, dia tsy horobainao ny fananan'Andriamanitra amin'ny fampiasanao izany mbahanatanterahana tetikasa manokana. - RH, 17 Desambra 1889.