"Mety madio va aho, raha manana mizana mandainga sy kitapo misy vato tsy marina?" - Mika 6:11.
Mofon’aina:
Ny olona mahitsy fo, araka ny famaran'i Kristy, dia izay haneho fahitsiana tsy azo hozongozonina. Fahavetavetana eo imason'Andriamanitra ny mizana mandainga (...) izay ampiasain'ny maro mba hampitomboana ny tombony azony eto amin'izao tontolo izao. Maro amin'ireo izay milaza fa mitandrina ny didin'Andriamanitra anefa no mampiasa mizana mandainga sy vato tsy marina. Raha manana firaisana tena izy amin'Andriamanitra ny lehilahy sy ny vehivavy, ary koa mitandrina ny lalàn'ny fahamarinany, dia hiseho eo amin'ny fiainany izany, satria hifandrindra amin'ny fampianaran'i Kristy ny asany rehetra. Tsy hanakalo ny fahamendrehany amin'ny tombon-tsoa izy ireo. Fanorenana azo antoka no iorenan'ny fitsipi-piainany, ary maneho izany fitsipi-piainany izany ny fitondrantenany eo amin'ny raharahan'izao tontolo izao.
Mamirapiratra tahaka ny volamena eo anivon'ny fako sy ny fahalotoana eto amin'izao tontolo izao ny fahitsiana tsy azo hozongozonina. Mety ho sarontsarona sy hiafina eo imason'ny olombelona ny fitaka sy ny hosoka ary ny tsy fahatokiana, saingy tsy miafina amin'Andriamanitra izany. Raketin'ny anjelin'i Jehôvah , izay manara-maso ny fitomboan'ny toetra sy manombana ny tombambidy ara-môraly, ao amin'ny bokin'ny lanitra ireny fandraharahana madinika izay maneho ny toetra ireny. Raha toa ny mpiasa tsy mahatoky eo amin'ny asa fanaony andavanandro ka manao tsinontsinona ny asany, dia tsy diso izao tontolo izao raha mitsara azy ka manombana ny fitsipi-piainany ara-pivavahana amin'ny alalan'ny fomba fanatanterahany ny asany.
"Ary izay mahatoky amin'ny kely indrindra dia mahatoky koa amin'ny be; ary izay tsy marina amin 'ny kely indrindra dia tsy marina koa amin'ny be." - Lio. 16:10. Tsy ny haben'ny toe-javatra no mamaritra ny maha-rariny na tsy rariny izany. Tahaka ny fitondrantenan'ny lehilahy sy ny vehivavy manoloana ny namany ihany ny fitondrantenany manoloana an'Andriamanitra. Tsy hanankinana na oviana na oviana ny tena harena ireo izay tsy mahatoky ao amin'ny mamônan'ny tsy fahamarinana. Aoka hotsarovan'ny zanak'Andriamanitra fa zahan-toetra izy ireo eo amin'ny fandraharahana rehetra ataony, ary lanjaina amin'ny mizanan'ny fitoerana masina. - TFC, b. 4, tt. 310,311.