"Fa miharia harena ho anareo any an-danitra, izay tsy misy kalalao na harafesina manimba, sady tsy misy mpangalatra manamitrano na mangalatra. Fa izay itoeran'ny harenao, dia ho any koa ny fonao." - Mat. 6:20,21.
Mofon’aina:
Ray sy reny marobe no mahantra eo anivon'ny harena. Ataony tsirambina izay tokony hahasoa azy, ary matetika izy no mandà tsy hanana izay ilainy sy ahitana fifaliana eo amin'ny fiainana ary hahazoana fahasalamana, na dia betsaka aza ny fahafaha-manao eo am-pelatanany. Mahatsiaro ho voarara tsy hampiasa ny fananany ho amin'izay mahasoa azy na koa ho amin'ny asa fiantrana izy ireo. Tanjona iray ihany no tena imasoany: ny hanangona fananana havela ho an'ny zanany.
Mibahan-toerana tokoa izany fiheverana izany, ary raiki-tampisaka eo amin'ny asany rehetra, ka manjary miandry fatratra ny fotoana hanomezany azy ny hareny ny zanany. Miantehitra amin'izany izy ireo, ary misy fiantraikany manan-danja nefa tsy mahasoa eo amin'ny toetrany izany fiheverana izany. Manjary mpandanilany foana ireo zanaka, ny sasany indray tonga tia tena sy mahihitra, ary ny hafa tonga kamo sy tsy mandray andraikitra. (...) Voasokitra ao amin'ny rafi-toetra ireo fiheverana voaray tany amin'ny fahazazana sy ny fahatanorana ary tonga fitsipika mifehy ny asa eo amin'ny fiainana maha-olon-dehibe. (...)
Mazava ny fanambaran 'ny Tenin'Andriamanitra mikasika ny vola nampindramina ny mpitantam-pananana, ary mazava koany fananarana sy ny fampitandremana nataony (...) mahakasika ny fomba fitantanana ny harena. Eo anatrehan'izany anefa, dia mandray andraikitra mahatahotra ny zanaka raha toa manery mivantana na ankolaka ny ray aman-dreniny mba hizara ny fananany amin'ny fahavelony na hanao didim-pananana izay manolotra izany ho eo an-tanan'ireo zanaka aorian'ny fahafatesany.
Ny zanaky ny ray sy reny efa nahazo taona, izay mitonona ho mpino ny fahamarinana, dia tokony hanoro hevitra sy hiangavy ny ray aman-dreniny mba ho mahatoky amin'ny finoany ka hampiasa ny hareny araka izay ankasitrahan'Andriamanitra. Tokony hihary harena ho an'ny tenany any an-danitra ireo ray aman-dreny ka hanokana ny hareny ho amin'ny fampandrosoana ny asan'Andriamanitra. Aoka izy ireo tsy handroba an'Andriamanitra amin'ny famelana harena fanampiny ho an'ireo efa manana ny ampy (...). - TFC, b. 3, tt. 119,120.