"Ary misy hafa koa izay voafafy teny amin'ny tsilo; dia ireo no ilay nandre ny teny, fa ny fiahiahiana izao fiainana izao sy ny fitaky ny harena ary ny filana ny zavatra hafa miditra, dia mangeja ny teny, ka tsy mamoa izy." — Mar. 4:18,19.
Mofon’aina:
Lazain'i Kristy manokana ny zavatra mampidi-doza ny fanahy. Araka ny voalazan' i Marka dia nofaritany "ny fiahiahiana izao fiainana izao sy ny fitaky ny harena ary ny filana ny zavatra hafa". (...) Ireo no mangeja ny teny sy ny fitomboan'ny voa ara-panahy. (...)
Tsy misy antokon'olona afaka amin'ny fakam-panahy mikasika ity fiahiahiana momba izao fiainana izao ity. Ho an'ny mahantra, dia ny asa mafy sy ny tsy fahampiana ary ny tahotra ny fahantrana no mitondra fahasahiranan-tsaina sy enta-mavesatra. Ho an'ny manan-karena dia tonga ny tahotra ny ho very fananana sy ahiahy feno tebiteby isan-karazany. Betsaka amin'ny mpanaraka an'i Kristy no manadino ny lesona nibaikoany antsika hianarana ny amin'ny voninkazo eny an-tsaha. Tsy matoky ny fikarakarany mandrakariva izy ireo. (...)
Maro amin'ireo izay mety hanam-bokatra eo amin 'ny fanompoana an'Andriamanitra no miforitra eo amin'ny fitadiavan-karena (...). Tsy maintsy miasa ny Kristianina, tsy maintsy mandray anjara amin'ny asa aman-draharaha, ary afaka hanao izany izy nefa tsy hanota. Nefa betsaka no variana loatra amin'ny asa aman-draharaha ka tsy manana fotoana hivavahana, tsy manana fotoana ianarana ny Baiboly, tsy manam-potoana hitadiavana sy hanompoana an'Andriamanitra. Indraindray manina ny fahamasinan'ny lanitra ny fanahy; nefa tsy misy fotoana ialana amin'ny horakorak'izao tontolo izao mba hihainoana ny filazana miezinezina sy feno fahefana avy amin'ny Fanahin'Andriamanitra. (...) Tsy azon'ny voan'ny teny atao ny mamokatra; satria ny ain'ny fanahy dia voagejan'ny tsilon'ny toetra araka izao tontolo izao.
Ary betsaka ireo izay miasa ho an'ny hafa, no latsaka amin'ny fahadisoana toy izany. Miasa ho an'ny hafa izy; mitambesatra ny adidiny, maro ny andraikiny ka avelany atao an-tsirambina ny firaisana amin' Andriamanitra amin'ny alalan'ny vavaka sy ny fianarana ny teniny. (...) Misara-dalana amin'i Kristy izy, tsy vonton'ny fahasoavan'ny Tompo ny fiainany ka miseho ireo toetra manokana mampiavaka ny fitiavan-tena. — HF, tt. 38,40.