EO ANIVON'NY VAHOAKANY
Nanome lesona ny vahoakany tamin'ny alalan'ny fitaovana maro samy hafa Andriamanitra, ary anankiray tamin'ireny fitaovana ireny ny tabernakely. Nanondro an'i Jesôsy ny fanompoam-pivavahana rehetra tao; lesona azo tsapain-tanana tao anatin'ny drafi-pamonjena ireny, izay hotanterahina amin'ny alalan'i Jesôsy taonjato maro aty aoriana.
Vakio ny Eks. 25:1-9. Inona no fahamarinana manan-danja sy mahasoa ary ara-teolojia hita ao amin'ireo andalan-teny ireo?
Na dia nitarika ny Isiraelita sy efa nanakaiky azy ireo aza Andriamanitra, dia nanome toromarika an'i Mosesy Izy mba hanorina fitoerana masina: "Ary asaovy manao fitoerana masina ho Ahy izy, dia honina eo aminy Aho." - Eks. 25:8. Niriny ny haneho amin'izy ireo amin'ny fomba azo tsapain-tanana fa tena eo amin'izy ireo tokoa Izy. Na dia nanao ratsy imbetsaka aza izy ireo, dia tsy nahafoy azy Izy, ary "taorian'ny nahazoan'izy ireo indray ny fankasitrahan'ny Lanitra" - PP, t. 343, dia nomena baiko izy ireo ka nanomboka ny fanorenana ny fitoerana masina.
Ambaran'ny Baiboly amintsika fa tsy mitoetra ao amin'ny tempoly sy ny trano nataon'ny tanan'olombelona Andriamanitra (Asa. 7:47-50) satria lehibe lavitra noho ny lanitry ny lanitra Izy ary tsy antonona Azy ny lanitra. Hoy i Paoly raha tany Areopago, tany Atena: "Andriamanitra Izay nanao izao tontolo izao sy ny eo aminy rehetra, Izy no Tompon'ny lanitra sy ny tany ka tsy mba mitoetra ao anaty tempoly nataon-tànana." -Asa. 17:24. Izao no nambaran'i Solomona mpanjaka: "Andriamanitra va dia honina ety an-tany tokoa? He! ny lanitra, ary ny lanitry ny lanitra aza tsy omby Anao, koa mainka fa ity trano nataoko ity!" - 1 Mpanj. 8:27. Ny fitoerana masina no toerana natao hisehoan'ny fanatrehan'Andriamanitra teo amin'izy ireo.
Nasaina nitondra fanatitra araka izay nampirisihin'ny fony ny Isiraelita, mba hanorenana ny tabernakely. Fanomezana lafo vidy sy sarobidy izany, toy ny volamena, ny volafotsy, ny varahina, ny hazo akasia, ary lamba isan-karazany sy ny diloilo oliva ary ny zava-manitra samihafa.
Tsipirian-javatra maro no omena antsika mikasika ny tabernakely sy ny fanompoam-pivavahana tao, ao amin'ny Eks. 25:10-27:21. Nomen'Andriamanitra mari-drafitra ahitana toromarika manokana | Mosesy, toromarika mahakasika ny fomba hanorenana ny tabernakely sy ny fanaka hatao ao anisan'izany ny fiaran'ny fanekena, ny mofo aseho, ny fanaovan-jiro, ny alitara, ny efitra lamba, ny loko sy ny refy samihafa.
Nasaina nanorina ny fitoerana masina araka ny modely nasehon'Andriamanitra azy i Mosesy (Eks. 25:9, 40; Eks. 26:30); maneho taratra ny fitoerana masina any an-danitra izany (Heb. 8:1, 2; Heb. 9:11). Nanana anjara asa nanan-danja tokoa ny fitoerana masina tety an-tany mandra-pahatonga ny fotoana nahafatesan'i Jesôsy sy ny asa ataony ao amin'ny fitoerana masina any an-danitra, izay tsy nampanan-kery intsony ny fitoerana masina teto an-tany. Fahamarinana iray naseho tamin'ny alalan'ny efitra lamban'ny fitoerana masina indrindra izay triatra izany, tamin'ny fotoana nahafatesan'i Kristy (Mat. 27:51; Mar. 15:38).