"Ary mivavaha mandrakariva ao amin'ny Fanahy amin'ny fivavahana rehetra sy ny fangatahana, ka miambena amin 'izany amin 'ny faharetana ,sy ny fangatahana rehetra ho an 'ny olona masina rehetra." – Efes. 6:18.
Mofon’aina:
Raha misy fotoana tokony maha trano fivavahana ny tokantrano tsirairay, dia ankehitriny izany. ( ...)
Kanefa, amin'izao andro feno loza mahatahotra izao, dia mbola misy amin'ireo mitonona ho Kristianina no tsy manana alitara ao an-tokantranony. (...)
Anisan'ny tetika mahomby indrindra ampiasain' i Satana hanim-bana ny fanahy ny hoe: tsy ilaina loatra ny vavaka. Mitodika any amin' Andriamanitra, Ilay loharanon'ny fahendrena, ny hery sy ny fiadanana ary ny fahasambarana, ny sainaao anatin'ny vavaka. Tafiditra ao anatin'ny vavaka ny fiaikena ny maha tsara sy tonga lafatra an'Andriamanitra, ny fisaorana Azy noho ny famindrampony, ny fiaiken-keloka sy fibebahana amin'ny fahotana, ary ny fitalahoana amim-pahatsoram-po ny fitahian'Andriamanitra — na ho an'ny tenantsika, na ho an'ny hafa.
Nivavaka tamin'ny Rainy tamin'ny fitarainana mafy sy ny ranomaso i Jesosy. Ary miantso ny mpino i Paoly hoe: "mivavaha, ka aza mitsahatra." - 1 Tes. 5:17. "Aza manahy na inona na inona; fa aoka ny fivavahana sy ny fifonana mbamin 'ny fisaorana no ho entinareo manambara ny fangatahanareo am in 'Andriamanitra amin 'ny zavatra rehetra." – Fil. 4:6.
(...) Zon'Andriamanitra ny manome toromarika harahina rehefa mivavaka Aminy; masina sy tsy azo iadian-kevitra ny fahefany. ( ...)
Tokony hanangana fefy ho fiarovana ny zanany amin'ny alalan'ny vavaka ny ray aman-dreny. Tokony hivavaka amim-pinoana tanteraka izy ireo mba hitoeran'Andriamanitra eo aminy, sy hiarovan'ny anjely masina azy sy ny zanany amin'ny herin'i Satana lozabe. (...)
Ry ray aman-dreny, farafahakeliny, marain-tsy hariva, aoka ianareo hanandratra ny fonareo amim-bavaka sy fanetren-tena amin'Andriamanitra, ho an' ny tenanareo sy ho an' ny zanakareo. Miatrika fakam-panahy sy fitsapana mandrakariva ny olon-tianareo. Misy zava-mampitebiteby sy manafintohina eo amin'ny lalan'ny olon-dehibe sy ny tanora isan'andro; ary izay maniry hanana fiainana feno faharetana sy fitiavana ary fifaliana eo anivon'ny fanel ingelenana isan-karazany dia tsy maintsy mivavaka. Tsy mety ho azo izany fandresena izany raha tsy mametraka tanjona hentitra sy tsy miova, amin'ny fiambenana tsy tapaka, ary miaraka amin'ny fanampiana mitohy avy amin'Andriamanitra. – ST, 7 Aogositra 1884.