«Dia izao no lazain'i Jehôvah Tompo: Indro, Izaho no efa nametraka vato ao Ziona, dia vato voazaha toetra, vato tsara izay fehizoro voaorina ho fanorenana mafy, ka tsy mba ho taitra izay mino.» - Isa. 28:16.
Mofon’aina:
Fa tsy misy mahay manao fanorenana hafa afa-tsy izay natao, dia Jesôsy Kristy» - 1 Kôr. 3:11. «Ary, tsy misy famonjena amin 'ny hafa; fa tsy misy anarana hafa ambanin 'ny lanitra nomena ny olona izay hahazoantsika famonjena» - Asa. 4:12. Kristy, Ilay teny, Ilay manambara an'Andriamanitra (...), eo Aminy ihany no azontsika anorenana toetra izay haharitra.
Manorina eo amin'i Kristy isika amin'ny fankatoavana ny Teniny. Tsy izay faly fotsiny amin'ny fahamarinana, no marina fa izay manatanteraka ny fahamarinana. Tsy ny faharavoravoam-panahy tsy akory no fahamasinana, fa ny fametrahana ny zavatra rehetra kosa ho eo amin'Andriamanitra, sy ny fanaovana ny sitrapon'ny Raintsika izay any an-danitra.
Ny fivavahana dia fanatanterahana ny tenin i Kristy: tsy fanatanterahana mba hahazoana sitraka amin'Andriamanitra tsy akory, fa satria, na tsy mendrika velively aza isika, dia nandray ny fanomezana, dia ny fitiavany. Tsy ny fiaikem-pinoana fotsiny no nataon i Kristy fototry ny famonjena ny olona, fa ny finoana izay miseho amin'ny alalan 'ny asam-pahamarinana. Tsy izay voakasiky ny Fanahy ny fony, na izay milefitra tsindraindray amin'ny heriny, no zanak ' Andriamanitra, "fa izay tarihin'ny Fanahin 'Andriamanitra no zanak'Andriamanitra" - Rôm. 8:14. —RH, 31 Desambra 1908.
Zanakalahy sy zanakavavin' Andriamanitra isika, mitombo tsara ho tempoly masina ao amin'ny Tompo. «Koa dia tsy mba vahiny sy mpivahiny intsony (...), fa tompon-tany, mpiray fanjakana amin 'ny olona masina sady ankohonan 'Andriamanitra, natsangana teo ambonin 'ny fanorenan 'ny Apôstôly sy ny mpaminany, ary Kristy Jesôsy no fehizoro indrindra.» - Efes. 2:19,20. Tombontsoantsika izany. (...)
Natao holanjaina eo amin'ny mizanan'ny fitoerana masina ny toetran'ny olona tsirairay; raha tsy mifanaraka amin'ireo tombontsoa sy fitahiana ny fivoarana ara-pitondrantena sy ara-panahy, dia asiana soratra hoe "latsa-danja" manadrify ny anarany. Ilay Fahazavan'izao tontolo izao no mpitarika antsika, ary mihamazava hatrany ny lalana, araka ny androsoantsika manaraka ny dian'i Jesosy. (...) Izay mandinika amim-panetren-tena ny toetran'i Jesôsy dia hitaratra ny endriny bebe kokoa hatrany. — RH, 19 Marsa 1895.