"Tsy mamaly ratsy ny ratsy, na fanaratsiana ny fanaratsiana; fa aoka hisaotra kosa, satria ho amin 'izany no niantsoana anareo mha handova fitahiana. "- 1 Pet. 3:9.
Mofon’aina:
Miezaha mafy tsy hanome fahafaham-po ny fahavalo ka hamaly ny teny fanakianana na koa ho kivy eo anatrehan'izany. Aoka tsy hahomby aminao ny ezaky ny fahavalo. Dia hanakaiky anao ny Tompo, ary hanome anao fitiavana sy fiadanana ary fifaliana safononoka, izay lalina sy feno tokoa, ka na misehatra fitsapana aza ny finoanao, dia ho afaka hanao fanambarana feno fandresena ny amin'ny fahamarinan'ny teny fikasana ianao. Ho tsapanao ny fanatrehan'Andriamanitra. Hampahiratina ny sainao, ary ho hitanao mazava ny fahamarinana izay indraindray nanjavozavo taminao. Ho afaka hilaza ny tantaran'ny hazo fijaliana ianao, amin'ny fankasitrahana lalina ny fitiavan'ny Mpamonjy, satria efa nampiempo ny fonao izany fitiavana izany. Ho hita eo aminao sy eo amin'ny fiainanao andavanandro i Kristy ao anatinao, Izay fanantenana ny voninahitra.
Banjino mandrakariva i Jesosy. Ento eo Aminy ny manahirana rehetra. Fantany tsara ny mahazo anao. Izy no fialofan'ny olony. Afa-doza izay eo ambanin'ny fiarovany. Aoka hino sy hatoky Azy. Hosakanany tsy hahazo anao ny mpandringana.
Aoka ho mamy sy feno hanitra ny rivo-piainana manodidina ny fanahinao. Raha miady amin'ny fitiavan-tena izay toetra mpahazo ny olombelona ianao, dia handroso hatrany amin'ny fiezahanao handresy ireo fironana ho amin'ny ratsy, na ny nolovaina izany na ny nokolokoloina. Amin'ny alalan'ny faharetana, ny fandeferana ary ny fiaretana no hahavitanao be. Tsarovy fa tsy mampietry anao ny teny tsy amim-pahendrena ataon'ny hafa, fa raha ianao kosa no manao izany, dia mampietry ny tenanao ka verinao ny fandresena izay tokony ho azonao. (...)
Mitoera eo amin'izay ahafahan'ireo fahefana telo lehibe any an-danitra mampahomby anao — dia ny Ray, ny Zanaka, ary ny Fanahy Masina. Miara-miasa amin'izay manolo-tena tanteraka ho an'Andriamanitra ireo hery ireo. Eo am-pelatanan'ny mpino an'Andriamanitra ny herin'ny lanitra. Ny olona izay manao an'Andriamanitra ho tokiny dia voahodidin'ny manda tsy hay ravana. – L, 1, 1904.