"Ny maso no jiron'ny tena; koa amin'izany, raha tsara ny masonao; dia hazava avokoa ny tenanao rehetra. " - Mat. 6:22.
Mofon’aina:
Ny asain’ny Fanahin’ Andriamanitra ao amin’ny olona iray dia tsy manakana azy amin'ny adidy tokony hatao eo amin'ny fiainana andavanandro. (...) Mahafaoka ny maha-olona manontolo ny asan'ny Fanahin'Andriamanitra: fanahy, vatana, ary saina.
Raha lalaina toy ny foto-kevitra miorina mafy ao am-po ny Tenin'Andriamanitra, ka hazonina tsara amin'ny toe-javatra rehetra, dia manjary milefitra amin'i Jesôsy Kristy ny olona (...). Miasa ho fanompoana an'i Kristy ny fisainany sy ny fahaiza-manaony rehetra. Izany no fanamasinana marina. (...) "Tsy manan-java-mahory" izy. Tsy mihazona na inona na inona ho an'ny tenany koa izy mba hanaovany izay mahafinaritra azy fotsiny. (...)
"Ny maso no jiron'ny tena; koa amin'izany, raha tsara ny masonao; dia hazava avokoa ny tenanao rehetra." "Ny masonao" no lazaina eto, fa tsy ny mason'olon-kafa. Very ny fanandramana tsara izay tokony ho tombontsoantsika rehefa olon-kafa no andrasantsika hijery eo amin'ny toerantsika, sy hitarika antsika toy ny jamba, eo amin'ny diantsika ara-panahy. Ny hanomezam-boninahitra an'Andriamanitra irery ihany no tokony ho tanjontsika. (...)
Izay tena tia sy matahotra an'Andriamanitra, ka manao izay hanatanterahana tsara ny sitrapony, dia hanolotra ny tenany, ny sainy, ny fony, ny fanahiny, ary ny heriny ho amin'ny fanompoana an'Andriamanitra. Toy izany i Enoka. Niara-nandeha tamin'Andriamanitra izy. (...) Dia toy izany no mampirindra tsara ny toetra; mahay mandanjalanja, mahatoky, feno fifaliana sy marina ilay olona. (...)
Samy ao anatin'ny fotoam-pahasoavana ianareo izao, ary samy manana ny fanandramany isan'andro; saingy indray mandeha monja eo amin'ny fiainana no mandalo amin'izany lalana izany ianareo. Koa aoka ny fotoana sarobidy rehetra hohararaotina araka izay tianareo hitranga rehefa tonga ny andro fitsarana ka hosokafana ny boky. Mifanaraka amin'ireo tombontsoa nomena antsika no hitsaran'ny Tompo antsika. – L, 128, 1897.