"Fa ny fanjakan'ny lanitra dia tahaka ny olona izay efa handeha ho any an-tany hafa ka niantso ny mpanompony, dia nanolotra azy ny fananany; koa ny anankiray nomeny talenta dimy, ny anankiray roa, ary ny anankiray iray-samy araka izay fahaizany avy; dia lasa nandeha izy."- Mat. 25:14, 15
Mofon’aina:
Ny fanoharana momba ny talenta dia mihatra manokana amin'ny olona tsirairay: ny lehilahy, ny vehivavy ary ny ankizy izay manana fahafahana misaina. (...) Rehefa niantso ireo mpanompony ny tompon-trano, dia samy nomeny asa ny tsirairay. Nomena andraikitra hampiasa ireo fananan'ny Tompony ny ankohonan'Andriamanitra manontolo. (...) Ny fahaiza-manao ara-panahy sy ara-tsaina ary ara-batana, ny hery miasa mangina, ny toerana misy ny olona sy ny fananany, ny fitiavana ary ny fangorahana — ireo rehetra ireo dia talenta sarobidy tokony hampiasaina ho amin'ny asan'ny Tompo, ho famonjena ireo fanahy izay nanoloran'i Kristy ny ainy.
Endrey, vitsy tokoa no mankasitraka ireo fitahiana ireo! Vitsy no miezaka hanatsara ny talentany sy mampitombo ny soa entiny ho an'izao tontolo izao! Ny Tompo (...) dia nanome ny tsirairay araka ny fahaiza-manao ananany avy, ary nanankina adidy taminy arakaraka izany. (...) Aoka ny mpandraharaha hanao ny asany amin'ny fomba izay manome voninahitra ny Tompony noho ny fahatokiany. Aoka izy hitondra ny finoany eo amin'izay rehetra ataony ary haneho amin'ny olona ny toe-tsain'i Kristy.
Ireo izay nahazo talenta betsaka kokoa dia tsy tokony hanamaivana ny lanjan'ny asa ataon'ireo izay kely kokoa ny fanomezam-pahasoavana ananany. Na dia ny fanomezana kely indrindra aza dia avy amin'Andriamanitra. Miaraka amin'ny fitahian'Andriamanitra, dia hitombo avo roa heny ny talenta iray ampiasaina amim-pahazotoana, ary ho tonga efatra ireo talenta roa ampiasaina amin'ny fanompoana an'i Kristy. Amin'izany no hitomboan'ny mpiasa tsotra indrindra amin'ny hery sy hahatonga azy hahasoa kokoa ny Tompony.
Ny finiavana lalina sy ny ezaka arahim-pandavan-tena dia hitan'Andriamanitra any an-danitra avokoa, ary ankasitrahany. (...) Ampiasao amim-pahalemem-panahy sy amim-panetren-tena ary amim-pinoana (...) ny fanomezam-pahasoavana anananao, ary miandrasa ny andro fitsarana; ainin'izay dia tsy hanana antony halahelovana na hahatsapana henatra ianao.- RH, 26 Oktobra 1911.