"Tomoera amiko ary Izaho aminareo. Tahaka ny sampany tsy mahay mamoa ho azy, dia toy izany koa hianareo, raha tsy miray amiko." - Jao. 15:4.
Mofon’Aina:
"Tomoera Amiko", teny manan-danja tokoa ireo. Ny hoe mitoetra ao amin'i Kristy dia midika hoe manana finoana velona sy vokatry ny fo tokoa ary mamelombelona, finoana izay miasa amin'ny fitiavana sy manadio ny fanahy. Midika ho fandraisana tsy tapaka ny toe-tsain'i Kristy izany, ary koa fiainana manolo-tena tanteraka ho amin'ny fanompoana Azy. Na aiza na aiza isian'izany firaisana izany dia hiseho ny asa tsara. Ny fiainan'ny voaloboka dia hiseho ho azy amin'ny voa entin'ny sampany. Ho fitahiana ho anao sy hahatonga anao ho fitahiana ny fanohanan'ny fahasoavan'i Kristy tsy tapaka, mandra-pahatonga ny fotoana hahafahanao miteny miaraka amin'i Paoly hoe: "Voahombo miaraka amin'i Kristy arnin 'ny hazo fijaliana aho, ary tsy izaho intsony no velona, fa Kristy no velona ato anatiko" - Gal. 2:20.
Ny firaisana masina amin'i Kristy no hampiray ny mpirahalahy amin'ny fatorana mamin'ny fifankatiavana kristianina. (...) Tsy misy toerana ho an'ny fangatsiahana sy ny fifandirana ary ny adilahy velively eo amin'ireo mpianatr'i Kristy. Finoana iray ihany no efa neken'izy ireo. Nikambana mba hanompo Tompo iray izy ireo, hiara-miatrika ady iray ihany, hiara-miezaka ho amin'ny tanjona iray, ary hiara-mandresy amin'ny toe-javatra iray. Ra sarobidy no nividianana azy rehetra ka hafatry ny famonjena iray ihany no notoriny. (...)
Ireo izay mitady hery mandrakariva eo amin'i Kristy no hanana ny toe-tsainy. Hitandrina hatrany izy ireo amin'ny teny ataony sy ny fitondrany ny tenany. Hitoetra ao amin'ny fanahiny ny fahatsapany mandrakariva ny hasarobidin'ny famonjena azy tamin'ny nanaovana sorona ilay Zanaka malalan'Andriamanitra. Hirakitra ao an-tsainy tahaka ny sary velona sy vaovao ny toe-javatra niseho teo Kalvary ka hilefitra sy halefaka ny fony noho izany fanehoana mahatalanjona ny fitiavan'i Kristy azy izany. Olona voavidin'ny rà sarobidin'i Kristy no hahitany ny hafa, ary ireo izay manana firaisana Aminy dia ho ambony sy voasandratra ary masina noho ny amin'izany fifandraisana izany. Ny fahafatesan'i Kristy teo Kalvary dia tokony hitarika antsika hanombana ny fanahy tahaka ny anombanan'i Kristy azy ireo. (...) - TMK, t. 132.