"Fa isika izay matanjaka dia tokony hitondra ny fahalemen'ny malemy ka tsy hitady izay hahafaly ny tenantsika ihany." - Rôm. 15:1.
Mofon'Aina:
Tsy tian'Andriamanitra ny hipetrahantsika eo amin'ny sezan'ny mpitsara ka hifam-pitsarantsika. (...) Rehefa mahita fahadisoana eo amin'ny hafa isika dia aoka hotsaroantsika fa mety ratsy kokoa noho izany aza ny helotsika eo imason'Andriamanitra raha oharina amin'ny an’ny rahalahintsika izay melohintsika. Aoka tsy hampibaribary ny fahalemeny isika fa hangataka amin'Andriamanitra mba hitahy sy hanampy azy handresy ny tsy mety ataony. Ankasitrahan'i Kristy izany toe-tsaina sy fihetsika izany, ary hanokatra lalana ho anao Izy mba hanaovanao tenim-pahendrena izay hanome hery sy hanampy ireo malemy amin'ny finoana.
Voatahy ny fifanampiana izay atao ao amin'ny finoana masina indrindra, fa ny fandravana kosa dia asa feno fangidiana sy fahoriana. Miray fo amin'ireo zanany mijaly i Kristy, satria hoy Izy hoe: "Araka izay efa nataonareo tamin'ny anankiray amin'ireto rahalahiko kely indrindra ireto no nataonareo tamiko." - Mat. 25:40. (...) Ny fo tsirairay dia manana ny fahoriany sy ny fahadisoam-panantenany, ka tokony hokatsahintsika izay hanamaivanana ny enta-mavesatry ny hafa amin'ny fanehoana ny fitiavan' i Jesôsy amin'ireo manodidina antsika (...).
Aoka isika tsy hijery ny fahalemen'ny hafa fa hanombana ny fahadisoantsika. Izao no fanontaniana tokony hapetraky ny tsirairay: moa ve mihavana amin'Andriamanitra ny foko? Moa ve izao ataoko izao manome voninahitra an'ilay Raiko any an-danitra? Raha nikolokolo toe-tsaina ratsy ianao, aoka izany hofoanana tsy ho ao amin'ny fanahy. Adidinao ny manongotra hatramin'ny fakany tsy ho ao am-ponao ny zavatra rehetra mandoto. Tokony hofongorana ny fangidiana rehetra raha tsy izany dia hosimban'ny hery miasa mangina ratsy avy aminy ny hafa. Aza avela hitoetra ao amin'ny sahan'ny fo ny zava-maniry misy poizina. Ongoty isan'ora izany, ary voleo ho solony ny fitiavana. Aoka i Jesôsy hitoetra ao amin'ny fanahy. I Kristy no ohatra ho antsika. Nandeha mba hanao soa Izy, ary velona mba ho fitahiana ho an'ny hafa. Ny fitiavana no nanome endrika kanto sy nanandratra ny Asany rehetra, ary omena baiko mba hanaraka ny dian-tongony isika. -TMK, t. 187.