"Fa zavatra iray loha no ataoko: manadino izay zavatra ao aoriana ka miezaka hanatratra izay zavatra eo aloha, eny, miezaka hanatratra ny marika aho hahazoako ny lokan'ny fiantsoan'Andriamanitra any ambony [ho any ambony] ao amin'i Kristy Jesosy." Fil. 3:13,14.
Mofon’aina:
Marobe ny zavatra nataon'i Paoly. Mpampianatra hendry tokoa izy, ary ny epistily nosoratany dia feno lesona maro izay manambara foto-pampianarana marina marobe. Nampiasa ny tanany izy nentiny nanaovana lay; izany no nahafahany namelona ny tenany isan'andro. (...) Nilanja enta-mavesatra ho an'ny fiangonana izy. Nanao ezaka tamin'ny fony izy hanehoana tamin'izy ireo ny fahadisoany, mba hanitsian'izy ireo izany sy tsy hahatonga azy ho voafitaka ka hanalavitra an'Andriamanitra. Nitady hatrany izay fomba hanampiana azy ireo izy teo amin'ny fahasahiranany, kanefa izao no nambarany momba izany: "zavatra iray loha no ataoko". (...) Nahatonga azy hampifantoka mandrakariva ny masony teo amin'i Jesosy Ilay Tompo sy Mpanefa ny finoany ny fahatsapana mandrakariva ny fanatrehan'Andriamanitra.
Tokony hanentana ny mpanompon'Andriamanitra hanolo-tena tanteraka amin'ny asany koa ny tanjona voalohany nanosika an'i Paoly handroso, ka hiatrika ny loza sy ny tebiteby nahazo azy. Hiseho eo anatrehany hampiala ny sainy tsy hibanjina ny Mpamonjy ny tany sy ny zava-mahatsiriritra eo aminy, kanefa aoka hiezaka hanatratra ny marika efa nokendreny hotratrarina izy. Hasehony amin'izao tontolo izao sy amin'ny olona ary amin'ny anjely, fa ny fahasambarana hahita ny tavan'Andriamanitra dia mendrika hanaovana ny fandavan-tena rehetra ilaina ho fahatanterahan'izany fanantenana izany.
Azon'izay ambany indrindra amin'ny mpianatr'i Kristy atao ny ho tonga mponin'ny lanitra, mpandova an'Andriamanitra amin'ny lova tsy mety lo sy maharitra. Raha mba misafidy ny fanomezana avy any an-danitra mantsy ny olon-drehetra, ka ho tonga mpandova an'Andriamanitra amin'ny lova izay azo antoka tsy ho azon'izay mpanimba, dia ny tontolo tsy misy fahataperana! Aza misafidy izao tontolo izao; fidio ny lova tsara kokoa noho izany.
Tsy ho eta dia hanatrika ny fanandratana ny Mpanjakantsika isika. Ireo izay nanana fiainana voafina tao amin'i Kristy, izay niady ny ady tsaran'ny finoana teto an-tany, dia hiara-mamiratra amin'ny voninahitry ny Mpanavotra any amin'ny fanjakan' Andriamanitra. – CC, t. 253.