« Mahatsiaro ny fanekeny mandrakizay Izy, dia ilay teny izay voadidiny ho an'ny taranaka arivo mandimby. » — Sal. 105:8.
Mofon’aina:
Mitana ny teny fikasana rehetra efa nomeny Andriamanitra. Ataovy an-tanana ny Baibolinao ka lazao hoe: "Efa nanao araka ny Teninao aho. Ity ny teny fikasanao: `Mangataha, dia homena hianareo; mitadiava, dia hahita hianareo; dondony, dia hovohana hianareo.' — Mat: 7:7". (...)
Ny avana manodidina ny seza fiandrianana dia toky fa marina Andriamanitra, fa tsy misy eo Aminy fiovaovana, na aloky ny fiodinana. Nanota taminy isika, ka tsy mendrika ny fankasitrahany; nefa Izy mihitsy no nametraka teo imolotsika ity fangatahana mampihetsi-po indrindra ity: "Noho ny amin'ny anaranao dia aza arianao izahay; aza atao tsinontsinona ny seza fiandrianan 'ny voninahitrao; tsarovy, ka aza tsoahina ny fanekenao taminay." - Jer. 14:21. Rehefa manatona Azy isika miaiky ny tsy fahamendrehantsika sy ny fahotantsika, dia mihaino ny fitarainantsika Izy. Nanao antoka ny voninahitry ny seza fiandrianany ho fanatanterahana ny teniny amintsika Izy.
Izay rehetra manolo-tena ho amin' ny fanompoana ny Tompo, ka mahafoy ny zavatra rehetra, dia omens hery hahazoany vokatra tsy hay tombanana. Efa nanao fanekena mandrakizay ny Tompo Andriamanitra fa hanampy hery sy fahasoavana ho an' izay rehetra nohamasinin'ny fankatoavana ny fahamarinana. (...)
Tombontsoan'ny Kristianina rehetra ny mivavaka toy ny nataon'i Nehemia (jereo ny Neh. 1 sy 2) amin'ny fotoana ilana izany ka toa tsy misy fomba hafa azo atao. Afaka manandratra vavaka ho fangatahana ny fitarihan'Andriamanitra ny mpiasa maro erehina ao anatin'ny rotoroton'ny fiainana, ireo izay voahodidin'ny olana sy mila ho safotry ny fahaverezan-kevitra. (...) Amin'ny fotoana isehoan'ny loza tampoka, ny fo dia afaka miantso vonjy amin'Ilay efa nanome toky fa ho avy hanampy ny olony mahatoky sy mino, na oviana na oviana no iantsoan'izy ireo Azy. Ary na aiza na aiza no misy azy, na amin'ny endri-javatra manao ahoana na manao ahoana, na torovan'alahelo, na ketraka noho ny ahiahy, na tafihin'ny fakam-panahy, dia hahita antoka sy fiarovana ary ny fampaherezana izy ireo ao amin'Ilay fitiavana tsy mety levona sy ny herin'Andriamanitra Izay tsy mivadika amin'ny teny nomeny. —GAG, t. 157.