"Amorony fo madio aho, Andriamanitra ô; ary havaozy hiorina marina ny fanahiko ato anatiko." - Sal. 51:10.
Mofon’aina:
Manadio ny fo ny Tompo, toy ny rehefa avela hifamezivezy ao amin'ny efitrano iray ny rivotra. Tsy hoe manidy varavarana sy varavarankely isika ka avy eo manipy fanafody simika hanadio ny ao anatiny, fa vohantsika midanadana ireo mba hahafahan'ny rivo-piainan'ny lanitra miditra, mifamoivoy ary manadio (...). Tsy maintsy sokafana manandrify ny lanitra ny varavarankelin'ny fahataitairana sy ny fihetseham-po, ary avoaka any ivelany ny vovoky ny fitiavan-tena sy ny fitiavana an'izao tontolo izao. Aoka hamafa ny efitrefitra rehetra ao amin'ny saina ny fahasoavan'Andriamanitra, ka ireo lohahevitry ny lanitra no tsy maintsy dinihiny, ary ny singa ara-nofo tsirairay dia mila ny Fanahy Masina hanadio sy hamelona azy.
Tsy ho osa ara-pitondran-tena izay miaina araka ny foto-kevitry ny fivavahana ara-Baiboly. (...) Tsy misy na inona na inona mahababo ny fihetseham-po, sy mahakasika ny antony manosika ny asan'ny olona hatrany amin'ny ati-fanahiny lalina, ary manana hery manova fiainana sy mampiorina tsara ny toetra, toy ny fivavahan' i Kristy. (...)
Ny fiangonana no tena ifantohan'ny fitiavan' i Kristy sy ny fikarakarany. Haneho ny toetrany amin'ny alalan'ny mambran'ny fiangonana Izy raha avelan'izy ireo. Hoy Izy aminy: "Hianareo no fahazavan 'izao tontolo izao (...)" — Mat. 5:14. Ireo izay miara-mandeha sy miresaka amin' Andriamanitra no manana ny hamoram-panahin'i Kristy. Hita eo amin'ny fiainan'izy ireo ny fandeferana, ny fahalemem-panahy, ny fifehezan-tena, ary ny zotom-po marina. Eo am-pizoran' izy ireo ho any an-danitra dia miala avokoa ireo melomeloka sy kitoantoana eo amin'ny toetrany ka miseho ny fahamasinana. Miasa eo amin'ny fanahy sy ny fo ny Fanahy Masina feno fahasoavana sy mahery.
Hovelomina, hodiovina, hotarihina, ary hofehezin'ny Fanahy Masina ny fo izay onenan'i Jesôsy , ary ny olombelona kosa hanao ny ezaka rehetra hampifandrindra ny toetrany amin'Andriamanitra. Hohalaviriny izay rehetra mifanohitra amin'ny sitrapo sy ny fisainan'Andriamanitra voambara. —GAG, t. 206.