"Izaho Jehôvah no mpiaro io; isaky ny indray mipi-maso no andemako azy, fandrao misy manimba azy; na andro na alina dia miaro azy Aho." — Isa. 27:2.
Mofon’aina:
Ny fanahin'ny olona madio sy masina dia tsy afaka miala vetivety amin'izany toeram-pahadiovana sy fahamasinana izany ka hitotongana sy hiharatsy ary hahavita heloka bevava tampoka. Mitaky fotoana ny fiovan-toetran' ny olona na ho amin'ny tsara araka ny endrik'Andriamanitra, na ho amin'ny ratsy araka an'i Satana. Ny fibanjinantsika no manoya antsika. Na nohariana araka ny endriky ny Mpanao azy aza ny olona dia afaka manazatra ny sainy amin'ny fahotana ka hanjary hahafinaritra azy ny ota izay nankahalainy taloha. Vantany vao mitsahatra tsy miambina sy mivavaka izy dia mitsahatra tsy miambina ny mandany, dia ny fony. (...) Tsy maintsy toherina mandrakariva ny fisainana ara-nofo, ary tsy maintsy manampy antsika ny herin'ny fahasoavan'Andriamanitra mpanadio, izay hitaona ny fisainana ho any an-danitra sy hanazatra azy hisaintsaina ireo zavatra madio sy masina.
Tsy avy amin'ny kisendrasendra ny toetra. Tsy ny fitroatry ny hatezerana indray maka, na dingana iray mankamin'ny lalan-diso no mamaritra izany. Ny fiverimberenan'ny fihetsika iray no manjary fahazarana ary mamolavola ny toetra, na ho amin'ny tsara na ho amin'ny ratsy. Tsy ho voavolavola ny toetra tsara raha tsy amin'ny fiezahana feno faharetana sy tsy mety sasatra, ary amin'ny fampitomboana ny talenta amam-pahaizana izay nankinina tamintsika ho fanomezam-boninahitra an'Andriamanitra.
Irin'Andriamanitra ny hanorenan-tsika toetra mifanaraka aminliay Môdely napetraka eo anoloantsika. Mila mandahatra ny biriky tsirairay isika, manampy fahasoavana eo ambonin'ny fahasoavana, mitady izay lafiny mampahalemy antsika ka manitsy izany hifanaraka amin'ny toromarika nomena.
Manome hery, fahafahana misaina, ary fotoana antsika Andriamanitra mba hahafahantsika manorina toetra izay azony asiana ny tombokasen'ny fankasitrahany eo amboniny. (...)
Izay maniry hitombo ho tonga trano tsara rafitra ho an'ny Tompo dia tsy maintsy mikolokolo ny fahaiza-manaony rehetra. Amin'ny fampiasana ny talenta araka ny tokony ho izy ihany no hahafahan'ny toetra mivelatra amim-pirindrana tsara. Dia toy izany no anorenantsika eo amin'izany fototra izany ilay lazain'nyTenin'Andriamanitra hoe: volamena, volafotsy, vatosoa, dia akora mahazaka ny fizahan-toetra amin'ny afon'Andriamanitra manadio. — GAG, t. 224.