"Aoka hisikina ny valahanareo sy hirehitra ny jironareo; ary aoka hianareo ho tahaka ny olona izay miandry ny tompony (...)." - Lio. 12:35,36.
Mofon’aina:
/zao no fotoana tokony hiomanana ho amin'ny fiavian'ny Tompontsika. Tsy ho vonona hihaona Aminy ao anatin'ny fotoana fohy isika, tsy maintsy miandry sy miambina isika ary miasa amin-kafanam-po tokoa mba ho vonona ho amin'izany toe-javatra manetriketrika izany. Amin' izany no hanomezan'ireo zanak'Andriamanitra voninahitra Azy; hanonona teny fampaherezana sy fanantenana ary finoana izy ao anivon'ny rotoroton'ny fiainana. Atokany ho amin'ny fanompoana an'Andriamanitra ny fananany sy ny maha-izy azy rehetra.
Ambaran'i Kristy amintsika ny fotoana hahatongavan'ny fanjakany. Tsy milaza Izy fa hiova fo izao tontolo izao, fa hoe: "hotorina amin'izao tontolo izao ity filazantsaran'ny fanjakana ity ho vavolombelona amin'ny firenena rehetra, dia vao ho tonga ny farany." — Mat. 24:14. Ananantsika ny fahefana manafaingana ny fiavian'ny andron'Andriamanitra amin'ny alalan'ny fitoriana ny filazantsara amin'izao tontolo izao. Raha nanao ny asa notendren'ny Tompo hataony ny fiangonan'i Kristy dia ho vita talohan'izao ny fampitandremana izao tontolo izao, ary ho efa tonga tamin-kery sy voninahitra teto an-tany ny Tompo Jesôsy.
Hery velona no tsy maintsy itoriana ny hafatry ny fiavian'i Kristy fanindroany. Tsy tokony hitsahatra isika raha tsy mahita fanahy marobe voaova fo ho amin'ilay fanantenana mahafinaritra momba ny fiverenan'ny Tompo. Niasa tokoa ny hafatra notorina tamin'ny andron'ireo apôstôly ka nampiala fanahy maro tamin'ny sampy ary nahatonga azy ireo hanompo an'Andriamanitra velona. Tena misy asa tokony hatao ihany koa amin'izao andro izao; amim-pahamatorana kokoa aza no tokony hitoriantsika ny hafatra satria mihantomotra kokoa ny andron'i Jehôvah. (...) Izao no asantsika: miandry, miambina, miasa, mivavaka ary mampitandrina an'izao tontolo izao.
Nanaitra ahy tokoa ny toe-javatra naseho ahy nandritra ny alina. Toy ny fihetsehana lehibe no hitako - fifohazana hita tany amin'ny toerana maro. Nirotsaka an-daharana ny olona hanoina ny antson'Andriamanitra. (...) Moa ve isika tsy hanoina ny antsony? Moa ve isika tsy hamboatra ny fanalantsika ka hanao tahaka ny olona miandry ny fiavian'ny Tompony? —GAG, t. 353.