« Raha maharitra ny asan'ny olona, (...) dia handray valim-pitia izy. » - 1 Kôr. 3:14.
Mofon’aina:
Ho be voninahitra tokoa ny valim-pitia hatolotra an'ireo . mpiasa mahatoky manodidina ny seza fiandrianan'Andriamanitra sy ny Zanak'ondry. Nahatsiaro ho toy ny maty i Jaona raha nibanjina ny voninahitr'Andriamanitra amin'ny maha-mety maty azy; tsy zakany ny nijery izany. Rehefa hotafina tsy fahafatesana kosa ireo zanak' Andriamanitra dia habita Azy "dia izay tena endriny tokoa"- 1 Jao. 3:2. Hijoro eo anoloan'ny sezafiandrianana izy ireo, hekena ho malala. Efa nofafana avokoa ny fahotany rehetra, ary nohadinoina ny tsy fahamarinany. Azony atao izao ny mijery ny voninahitra mamirapiratry ny seza fiandrianan'Andriamanitra. Niara-nitondra ny fahorian'i Kristy izy ireo, niara-niasa Taminy tao amin'ny drafi-pamonjena, ary miombona Aminy ao amin'ny fifaliana amin'ny fahitana ireo fanahy maro voavonjy any amin'ny fanjakan'Andriamanitra, mba hidera an'Andriamanitra mandritra ny mandrakizay.
Hamirapiratra ao amin'ny voninahitry ny Ray sy ny Zanaka ireo voavonjy amin'izay andro izay. Hiarahaba ny Mpanjaka sy ireo amboaram-pandreseny ireo anjely mitendry lokanga volamena. (...) Hiram-pandresena no hanakoako hameno ny lanitra. Nandresy i Kristy. Miditra ny lapan'ny lanitra Izy, arahin'ireo voavonjy, dia ireo vavolombelona maneho fa tsy foana tsy akory ny fahoriana niaretany sy ny sorona nataony. (...)
Misy fonenana natao ho an'ireo mpivahiny et S/ an-tany, fitafiana ho an'ireo marina, ary satroboninahitra feno voninahitra sy sampan-drofian'ny fandresena. Hohazavaina ireo zavatra rehetra nanahiran-tsaina antsika mikasika ny fitantanan'Andriamanitra teto an-tany. Ho azontsika ny fanazavana ireo zavatra saro-takarina. Haseho miharihary eo anoloantsika ireo zava-miafin'ny fahasoavana. Firindrana tonga lafatra sy maha-te ho tia no ho hitantsika eo amin'izay tsy ahitan'ny saintsika voafetra afa-tsy fahaverezan-kevitra sy fampanantenana tsy tanteraka. Ho fantatsika fa fitiavana mandrakizay no nibaiko ireo fanandramana izay toa mafy indrindra. Hifaly amin'ny fifaliana tsy hay lazaina sy feno voninahitra isika rehefa hahatsapa ny fiahiana feno fitiavan'Ilay manao ny zavatra rehetra hiara-miasa hahasoa antsika.
Mananatra anao aho mba hiomana ho amin'ny fiavian' i Kristy eny amin'ny rahon'ny lanitra. (...) Miornâna hiatrika ny fitsarana, ka rehefa ho avy i Kristy mba "higagana eo amin'izay rehetra mino", dia ho anisan'ireo izay hitsena Azy amim-piadanana ianao. — GAG, t. 355.