Vakio ny Sal. 17:7-9; Sal. 31:1-3, sy ny Sal. 91:2-7. Inona no ataon'ilay mpanao Salamo ao anatin'ny fotoan-tsarotra?
Tojo olana isan-karazany ny mpanao Salamo eto, ary mitodika amin'i Jehovah izy ao anatin'izany rehetra izany, Izay aro ho azy ao anatin'ny fahoriana, na toy inona na toy inona izany. Ny matoky an'Andriamanitra dia ny mifidy tsotra izao hanaiky an'Andriamanitra ho Tompo mpanapaka ny fiainana na inona na inona toe-java-miseho. Raha afaka mitoky amin'Andriamanitra ao anatin'ny fotoan- tsarotra isika dia ho afaka hitoky Aminy amin'ny fotoana rehetra.
Ny fanandraman'ilay mpanao Salamo tamin'ny lasa no mahatonga azy hanao hoe: "Izaho hilaza an'i Jehovah hoe: Fialofako sy batery fiarovana ho ahy Izy ary Andriamanitro, Izay hitokiako." - Sal. 91:2, ary ankehitriny izany dia manatanjaka ny finoany ny amin'ny hoavy. Antsoiny hoe "Avo Indrindra" sy "Tsitoha" Andriamanitra noho ny fahatsiarovany ny fahalehibiazan'ilay Andriamaniny tsy takatry ny sainy.
Miresaka ny amin'ny fiarovana mety ho hita ao amin'Andriamanitra koa ilay mpanao Salamo: "Fierena" ("toerana miafina" - DIEM), "aloky ny Tsitoha" (Sal. 91:1), "Fialofako sy batery fiarovana" (Sal. 91:4), ary "fonenana" (Sal. 91:9) hoy izy. Maneho toeram-pialofana avokoa ireo amin'ny kolontsain'ny mpanao Salamo. Saino ny hafanana mandoron'ny masoandro any amin'iny faritra iny, dia ho azoriao an-tsaina ny hatsaran'ny alokaloka, na tsarovy ireo fotoan'ny ady teo amin'ny tantaran'ny Isiraely dia hahafaly anao ny fiarovana entin'ny ampinga na ny batery fiarovana.
Vakio ny Sal. 17:8 sy ny Mat. 23:37. Inona ny sary an'ohatra ampiasaina eto, ary inona no ambarany?
Iray amin'ireo sary an'ohatra maneho indrindra ny fahakekezan'Andriamanitra ny hoe: "ao ambanin'ny aloky ny elatrao" (Sal. 17: 8; Sal. 57:1; Sal. 63:7). Manolotra fampaherezana sy toky io fanoharana io amin'ny fanehoana ny renivorona iray miaro ny zanany. Oharina amin'ny voromahery izay miaro ny zanany ao ambanin'ny elany ny Tompo (Eks. 19:4; Deo. 32:11), ary koa amin'ny reniakoho manangona ny zanany ao ambanin'ny elany (Mat. 23:37).
Rehefa mamely anefa ny loza ka toa tsy hitantsika ny fiarovan' Andriamanitra, dia manao ahoana ny fiatrehantsika izany? Ny fahorian- tsaintsika ve midika fa tsy miaraka amintsika eo Andriamanitra? Hazavao.