Hamafisina ombieny ombieny ao amin'ny Salamo ilay fahamarinana fa Jehovah Andriamanitra, Izay Mpahary sy Mpamelona izao tontolo rehetra izao dia maneho ny Tenany koa ho Andriamanitra akaiky ny isambatan'olona, Izay mifandray sy mikolokolo fifandraisana amin'ny olony.
Akaiky ny vahoakany sy ny voariny, na eto an-tany na any an-danitra, Andriamanitra (Sal. 73:23,25). Na dia "nampitoetra ny seza fiandrianany any an- danitra" aza Izy - Sal. 103:19, ka "mitaingina mamaky ny efitra" - Sal. 68:4, dia "eo akaikin'izay rehetra miantso Azy, dia izay rehetra miantso Azy marina tokoa" - Sal. 145:18. Asongadin'ny Salamo mazava ny fahamarinana fa Jehovah no Andriamanitra velona izay miasa ho an'ireo izay miantso Azy (Sal. 55:16-22). Noho izao antony izao indrindra no mahatonga ny Salamo hanan-danja lehibe: tsindrimandry avy amin'llay Andriamanitra velona Izay mihaino sy mamaly vavaka izany, sady vavaka atao Aminy koa.
Tsy azontsika hadinoina fa fiainam-pinoana sy fankatoavana ny didin'Andriamanitra no tokony hasetrintsika izany fanakekezany antsika izany. Tsy azon'ny Tompo ekena ny latsaka noho izany, araka ny hita matetika teo amin'ny tantaran'ny Isiraely.