Vakio ny PM, toko faha-18, "Ilay tolona mamatonalina". Inona ny lesona azontsika raisina avy amin'ny fanandraman'i Jakoba momba ny fikirizana mivavaka sy ny fitokiana tanteraka amin'Andriamanitra?
Manatanjaka ny finoantsika an'Andriamanitra, Izay Fiarovana azo antoka ho an'ireo izay mametraka ny fiainany eo am-pelatanany mahery, ny Salamo. "Hanao zava-dehibe amin'izay miankina Aminy Andriamanitra. Ho avy tokoa hanampy ireo izay manolo-tena manontolo Aminy sy mankato Azy Izy. Ny antony tsy maha-ampy ny herin'ny olona, dia noho izy matoky tena loatra, fa tsy mamela ny Tompo hampiseho ny heriny."- PM, t. 491 (ed 2014).
Mety hanahirana tokoa anefa ny Salamo sasany rehefa tsy mifanaraka amin'ny toe-javatra iainantsika ankehitriny ny toky omena ao. Amin'ny fotoana toy izany dia tsotra ihany: aoka isika hianatra hatoky ny fahatsaran'Andriamanitra, izay naseho tamin-kery indrindra teo amin'ny hazo fijaliana.
Indraindray koa mety hisy hampiasa ny Salamo sasany ho famelomana fanantenana sandoka. Ny valin-teny nasetrin'i Jesôsy ny fampiasan'i Satana ny Sal. 91:11,12 tamin'ny fomba diso dia maneho fa tsy azo afangaro ny fitokiana amin'Andriamanitra sy ny fakàna fanahy an'Andriamanitra (Mat. 4:5-7) na ny fahasahiam-poana mangataka amin'Andriamanitra zavatra mifanohitra amin'ny sitrapony.
"Ny fandresena lehibe azon'ny Fiangonana, na azon'ny Kristianina tsirairay avy, dia tsy mba vokatry ny talenta, na ny fitaizana, na ny harena, na ny tombontsoa avy amin'olombelona tsy akory, fa vokatry ny fivavahana mangina izay natao teo anatrehan'Andriamanitra, tamim-pinoana miredareda sady tsy azo hozongozonina izay mamihina mafy ny herin'ny Tsitoha." - PM, t. 185.
FANONTANIANA hifanankalozan-kevitra
- Ifanakalozy hevitra ao amin'ny kilasy ny valin'ny fanontaniana farany ao amin'ny lesona Talata, momba ny fitokiana amin'Andriamanitra ao anatin'ny fotoan-tsarotra sy rehefa tsy misy mandeha amin'ny laoniny ny zavatra rehetra. Ahoana no tokony hahatakarana ireny zava- tsarotra ireny? Ahoana no mahatonga izany hitranga amin'ny olona na dia eo aza ireo teny fikasana mahafinaritra omen'ny Salamo momba ny fiarovan'Andriamanitra? Saino koa ity: Moa ilay mpanao Salamo nanoratra ireo teny fikasana mahafinaritra ireo ve tsy mba nandalo fotoan-tsarotra na nahalala olona mahatoky tra-pahoriana koa?
- Ahoana no hahaizantsika mitoky tanteraka amin'Andriamanitra na inona na inona toe-javatra mitranga (ohatra, Sal. 91:14; Sal. 143:8,10; Sal. 145:18-20)? Inona no mety hahatonga antsika hanary toky? Nahoana no tena ilaina ny matoky an'Andriamanitra mandritra ny fotoam-piadanana mba hahaizantsika mitoky Aminy amin'ny fotoam-pahoriana koa?