Vakio ny "Amintsika Andriamanitra", toko 1 ao amin'ny IFM. Sady vavaka ataon'i Kristy ny Salamo no vavaka momba an'i Kristy. Ao amin'ny Salamo no ahitana fanambarana miavaka momba Azy sy ny asa fanavotana nataony amin'ny maha llay "Amintsika Andriamanitra" Azy (Mat. 1:23). I Jesôsy llay Andriamanitra "Amintsika" ao amin'ny vavaka mitolona amin'ny fahatsapana ho nafoy sy ny fahoriana. Izy ilay "Amintsika Andriamanitra" ao anatin'ny fitalahoana rariny sy fanafahana. Jesosy ilay Andriamanitra "Amintsika" izay tsy mahafoy antsika ho amin'ny fahaverezana sy ny fahakiviana fa manoro antsika ny lalana mankamin'ny finoana mandresy. Tonga Mpisorona mandrakizay sy Mpanjaka noho ny amintsika Izy mba hamonjena antsika amin'ny fanamelohana mandrakizain'ny fahotana. Ao amin'i Kristy, ilay Mpanjaka tonga lafatra amin'ny taranak'i Davida, no ahatanterahan'ny teny fikasana miezinezina rehetra mikasika ny famonjena (2 Kor. 1:20).
Feno fahendrena tokoa ny fomba amelabelaran'i Ellen G. White ny firaisan'i Kristy amin'ny taranak'olombelona: "Tamin'ny alalan'ny maha-olombelona Azy dia nandray ny taranak'olombelona Kristy; amin'ny alalan'ny maha-Andriamanitra Azy, dia mamikitra ny seza fiandrianan'Andriamanitra Izy. Amin'ny maha-Zanak'olona Azy, dia nanome oha-pankatoavana antsika Izy, amin'ny maha-Zanak'Andriamanitra Azy, dia manome antsika hery hoenti-mankato Azy Izy. Kristy no niteny tamin'i Mosesy avy tao amin'ilay roimemy teo amin'ny tendrombohitra Horeba ka nanao hoe: 'IZAHO IZAY IZY... Izao no lazainao amin'ny Zanak'Isiraely: IZAHO IZAY IZY no efa naniraka ahy ho aty aminareo.' (Eks. 3:14). lo no antoky ny fanafahana ny Isiraely. Toy izany koa rehefa tonga teo amin'ny 'fitoviana tamin'ny olona Izy', dia nambarany ny tenany fa ilay IZY. Ilay Zaza tany Betlehema, llay Mpamonjy malemy fanahy sady tsy miavona am-po no Andriamanitra 'naseho teo amin'ny nofo' (1 Tim. 3:16). Ary hoy Izy amintsika: 'IZAHO no Mpiandry tsara.' 'IZAHO no mofon'aina.' 'IZAHO no Lalana sy Fahamarinana ary Fiainana.' 'Efa nomena Ahy ny fahefana rehetra any an-danitra sy ety an-tany.' (Jao. 10:11; 6:51; 14:6; Mat. 28:18). IZAHO no antoky ny teny fikasana rehetra. IZAHO, aza matahotra."- IFM, t. 15.
FANONTANIANA hifanankalozan-kevitra
- Ahoana no nanehoan'Andriamanitra ny fahatokiany tsy mihozongozona amin'ny Fanekeny na eo aza ny tsy fahatokian'ny olona? Inona ny fanomezan-toky entin'izany ho an'ireo zanak'Andriamanitra miatrika tolona ankehitriny?
- Ahoana no anamafisan'ny fisoronana miavaka sy ambony indrindra ataon'i Kristy araka ny fanaon'i Melkizedeka ny maha-azo antoka ny famonjena ny vahoakan' Andriamanitra?
- Asehon'ny Filazantsara fa teny fikasana maro momba ny Mesia ao amin'ny Salamo no tanteraka ao amin'i Jesôsy Kristy. Ahoana no anehoan'izany ny fahamarinan'ny Tenin'Andriamanitra? Nahoana isika no tokony hanohitra ny fihetseham-po rehetra izay mitady hampihena ny fitokiantsika amin'ny tenin'Andriamanitra?
- Inona ny fampiononana lehibe azontsika tsoahina avy amin'ny tenin'i Kristy manao hoe: "Efa nomena Ahy ny fahefana rehetra any an-danitra sy ety an- tany."- Mat. 28:18? Ahoana no ampiharantsika io teny fikasana io eo amin'ny fanandramantsika manokana?