Antso hoe: 'Avelao izahay; moa mifaninona akory izahay sy Hianao, ry Jesôsy avy any Nazareta? Avy handringana anay va Hianao? Fantatro fa llay Masin’Andriamanitra Hianao.'
Samy nikorontana sy taitra avokoa ny olona. Niala teo amin'i Kristy ny sain'ny vahoaka ka tsy nohenoina intsony ny teniny. Izany no fikasan'i Satana tamin'ny nitarihany io hazany io tao amin'ny Synagoga. Notenenin'i Jesôsy ary ilay demonia hoe: 'Mangina hianao, ka mivoaha aminy. Ary ny demonia nony namotraka azy teo afovoan'ny olona, dia nivoaka taminy, nefa tsy naharatra azy.' (...) Ilay efa naharesy an'i Satana tany an-efitry ny fakam-panahy no indro mifanatrika indray tamin'ny fahavalony. Nampiasa ny heriny rehetra ilay demonia hitana ao ambany fifehezany ilay hazany. Ny mitsoaka ady eto dia fanomezana ny fandresena an'i Jesôsy. (...) Niteny tamim-pahefana anefa ny Mpamonjy ka nahafaka ny babo." - IFM, tt. 259, 260.
Teo ankilan'izany, dia nisahana asa fanompoana maro tokoa i Jesôsy, nifindrafindra toerana Izy ary saiky nifangaro tamin'ny olona maro mandrakariva. Ahoana no nihazonany toetra tony sy tsy azo nohozongozonina teo amin'ny asany sy teo anatrehan'ny olona? Tsy isalasalana fa noho ny fanandraman'ny fivavahana nananany isan'andro izany.
Mieritrereta fandaharam-potoana azonao ampiharina mikasika ny fivavahana sy ny fianarana ny Soratra Masina. Jereo izay mety aminao, ary manokàna fotoana hikolokoloana toe-tsaina tony eo ambany fitarihan'ny Fanahy sy ny Tenin'Andriamanitra.
FANONTANIANA hifanakalozan-kevitra
1. Resaho ao amin'ny kilasy ny momba ny vavaka sy ny antony maha-zava-dehibe izany eo amin'ny fiainana kristianina. Inona avy ireo fanontaniana apetraky ny olona mikasika ny tanjon'ny vavaka sy ny fahombiazan'izany?
2. Resaho ao amin'ny kilasy ny amin'ny toerana izay mety mahatsara kokoa ny tsy hilazalazana momba Izay inoantsika. Rahoviana no tokony hitandremana tahaka izany, ary ahoana no hitandremana kanefa tsy hanaovantsika marimaritra iraisana momba ny fijoroantsika ho vavolombelona?
3. Iza ireo "boka" eo amin'ny kolontsaina misy anao ankehitriny? Ahoana no hanatraran'ny fiangonana misy anao ireny olona ireny sy "hikasihany" azy mba hitondrana ny filazantsara ho eo amin'izy ireo?