Vakio ny Sal. 8 sy Sal. 100. Ahoana no anehoana an' Andriamanitra sy ny olona ao amin'ireo Salamo ireo? Inona no ambaran'ireo Salamo ireo mikasika ny toetran'Andriamanitra?
Mitana anjara toerana lehibe ao amin'ny Salamo ny Famoronana, eo amin'ny fanambarana ny fiandrianan'Andriamanitra. Ny lanitra, izay "asan'ny tànany" dia mitory ny voninahiny sy ny heriny (Sal. 19:1-4; Sal. 97:6). Manana voninahitra manerana ny tany rehetra ny anaran'Andriamanitra (Sal. 8:1,9). Jehovah no namorona ny zavatra rehetra; tsy manana fiandohana Izy (Sal. 93:2) ary tsy manam-piafarana (Sal. 102:25-27). Mandrakizay Izy ary ambonin'ny andriamanitry ny firenena rehetra izay "asan'ny tanan'olona" ihany (Sal. 115:4). Ny sampy dia "manan-tanana (...) fa tsy mandray" - Sal. 115:7; fa i Jehovah kosa dia "eo an-tànany ny fitoerana lalina amin'ny tany (...) ary ny tany maina dia noforonin'ny tànany." - Sal. 95:4,5.
Salamo marobe no maneho ny herin'Andriamanitra ambonin'ireo hery rehetra eo amin'ny zavaboary izay inoan'ny firenena hafa ho andriamanitra (ohatra amin'izany ny Sal. 29; 93; 104). Hamafisin'ireo Salamo ireo ny fanambarana fa Andriamanitra no manjaka amin'ny zavaboary rehetra, ary ambony indrindra amin'ny hery sy ny haja. Miresaka ny amin'ny endri-panompoan-tsampy iray izay tsy miharihary ny Sal. 100:3: ny fitokiana amin'ny tena; asongadiny amin'izany fa Jehovah no "nanao antsika, fa tsy ny tenantsika" (DIEM).
Mijoro ho vavolombelon'ny fitiavan'Andriamanitra koa ny Famoronana. Izy no nahary ny zavatra rehetra izay misy, ary izy koa no manome aina ireny (Sal. 95:7; Sal. 147:4-9). Mariho fa tsy nahary ny olona fotsiny Andriamanitra fa nataony "olony sy ondry fiandriny" ny Isiraely fahiny (Sal. 100:3). Maneho ny fanirian'Andriamanitra hanana fifandraisana ety amin'ny vahoakany ny hoe "olony" sy "ondry fiandriny".
Ny Mpamorona irery ihany no manana ny fahefana hitahy sy hampitombo ny vahoakany, ary amin'izany dia Izy irery ihany no mendrika ny hiankohofan'izy ireo sy hitokiany. Salamo marobe no miantso izay manam-pofonaina rehetra, ny tany manontolo, ny ranomasina ary ny zavatra rehetra ao aminy hanao hiakam- pifaliana eo anatrehan'i Jehovah.
Hita eo amin'ny zavatra nohariany ny voninahitr'Andriamanitra, na dia eo amin'ny zavaboary lavo eto an-tany aza; ary ny Salamo dia milaza amintsika fa Andriamanitra irery ihany no mendrika hiankohofana.
"Inona moa ny olona, no ahatsiarovanao azy? Ary ny zanak'olombelona, no amangianao azy?"- Sal. 8:4. Inona no asetrinao an'Andriamanitra amin'ny maha-Mpamorona anao Azy? Raha tononin'Andriamanitra amin'ny anarany avy ny kintana (Sal. 147:4), manao ahoana moa ny haben'ny fiheverany anao?